ފުލުހުން ހުރަސް އެޅުމުން މުޒާހަރާ ނިންމާލައިފި

އެމްޑީޕީން މިރޭ ކުރިޔަށް ގެންދިޔަ މުޒާހަރާ ނިންމާލި ނަމަވެސް ގިނަ އަދަދެއްގެ މީހުން އަދިވެސް އެ ސަރަހައްދުގައި ހަރަކާތްތެރިވަމުން އެބަދޭ. މުޒާހަރާގެ ބައިވެރިން ދަނީ ރައީސް މުއިއްޒުގެ އިސްތިއުފާއަށް ގޮވާލަމުން.

އާޓިފިޝަލް ބީޗަށް ވަދެ ފުލުހުން ބައެއް މީހުން ހައްޔަރުކޮށްފި. އަދި މަޖީދީމަގުން ވެސް ގިނަ އަދަދެއްގެ މީހުން ހައްޔަރުކޮށްފި. ފުލުހުން އަދިވެސް އަންނަނީ އާއްމުން ދުރަށް ދިއުމަށް އިންޒާރު ދެމުން.

ފުލުހުން ގެންދަނީ މުޒާހަރާގެ އަޑު ކަނޑުވާލަން ކަންފަތަށް އުނދަގޫވާ ޒާތުގެ އަޑުތައް ފޮނުވަމުން. އަދި މޮބައިލް ފޯނުގެ ސިގްނަލް ޖޭމްކޮށްފައިވާ ކަމަށް މުޒާހަރާގެ ބައިވެރިން ބުނޭ.

މުޒާހަރާގެ އެންމެ ކުރީ ސަފަށް ރައީސް އިބްރާހިމް މުހައްމަދު ސޯލިހު ވެސް ވަޑައިގެންފި. އެއާއެކު މުޒާހަރާގެ ފޯރި އަންނަނީ ގަދަވަމުން.

ފުލުހުން ގެންދަނީ ޝީލްޑު ބޭނުންކޮށްގެން އާއްމުން ފަހަތަށް ޖައްސަން މަސައްކަތް ކުރަމުން. ނަމަވެސް މުޒާހާރާގެ ބައިވެރިން ތިބީ ފަހަތަށް ޖެހޭ ގޮތަކަށް ނޫން.

މުޒާހަރާގެ ތެރެއިން ވަރަށް އަނިޔާވެރިކޮށް ފުލުހުން ގެންދަނީ އާއްމުން ހައްޔަރުކުރަމުން. އެމްޑީޕީން ވަނީ ހައްޔަރުކުރި މީހުން ދޫކޮށްލަން ގޮވާލާފައި.

މުޒާހަރާގެ ބައިވެރިވަނީ މިހާރު ދަނީ މަޖީދީމަގުން ކުރިޔަށް ދާން މަސައްކަތް ފަށައިފި. އެންމެން ކުރިޔަށް ދާން ދަނީ މަސައްކަތް ކުރަމުން. "ކުރިޔަށް ކުރިޔަށް ބާރަށް ކުރިޔަށް" ކިޔަމުން ކުރިޔަށް ދާން ދަނީ މަސައްކަތް ކުރަމުން.

މުޒާހަރާގެ ތެރެއިން ފުލުހުން ގެންދަނީ އާއްމުން ހައްޔަރުކުރަމުން. އަދި އާއްމުން ދަނީ މަޖީދީމަގުން ކުރިޔަށްދާން މަސައްކަތްކުރަމުން.

އެމްޑީޕީގެ ސައުންޑް ޕިކަޕް ފުލުހުންގެ ބެލުމުގެ ދަށަށް ގެންގޮސްފި. ފުލުހުން އެ ޕިކަޕަށް އަރައި ތަކެއްޗަށް ގެއްލުން ވެސް ދިން

މާރިޔާ ވިދާޅުވީ "އިންޑިއާ އައުޓް" ގޮވާލި މީހަކު މިހާރު ނެތް ކަމަށާއި އެ ޓީޝާޓް ލީ މީހަކު ވެސް ނެތް ކަމަށް.

ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ މުޒާހަރާގެ ބައިވެރިންނާ ވާހަކަ ދައްކަވަމުން ވިދާޅުވީ ފުލުހުން އާއްމުންނާ ކުރިމަތިނުލާނެ ކަމަށް. އަދި އެއްވުމުގެ ބައިވެރިން ދުރަށް ނުދިއުމަށް އޭނާ ގޮވާލެއްވި

ފުލުހުން ދަނީ ޕެޕާ ސްޕްރޭ ޖަހައި މީހުން ފޮނުވާލަން މަސައްކަތްކުރަމުން. މިގޮތުން ނޫސްވެރިންނާއި މަޖްލިސް މެމްބަރުންގެ ލޮލަށް އަމާޒުކޮށް ފުލުހުން ދަނީ ޕެޕާ ސްޕްރޭ ޖަހަމުން.

އާޓިފިޝަލް ބީޗް ކުރިމަތީގައި ތިބި އާއްމުން މަޖީދީމަގުން ނުދިއުމަށް ފުލުހުން ދަނީ އަންގަމުން. އަދި އެ ސަރަހައްދު ދޫކޮށް ދިއުމަށް ފުލުހުން ދަނީ އިންޒާރު ދެމުން.

ފުލުހަކު ހިފައިގެން ހުރި ޝީލްޑެއް އަތުލުމުން ހޯމް މިނިސްޓަރު އަލީ އިހުސާން އެކަން ކުށްވެރިކޮށްފި. ވިދާޅުވީ މިއީ ސުލްހަވެރި އެއްވުމަކުން ފެނިގެންވާނެ ކަމެއް ނޫން ކަމަށް.

ފުލުހުން ދަނީ މުޒާހަރާގެ ކަވަރޭޖް ހެދުމުގައި ހަރަކާތްތެރިވަމުން އަންނަ ނޫސްވެރިންނަށް ވެސް ހުރަސް އަޅަމުން. މީގެ ކުރިން ފުލުހުން ނޫސްވެރިންނަށް އެއްބާރުލުން ދޭ. ނަމަވެސް މިފަހަރު ފުލުހުން ނޫސްވެރިންނާ މެދު ވެސް އަމަލުކުރަނީ އާއްމުންނާ އެއްގޮތަށް.

މުޒާހަރާގެ ބައިވެރިންނަށް އަދިވެސް ކުރިޔަށްދާނެ ފުރުސަތެއް ފުލުހުން ނުދޭ. ފުލުހުން ދަނީ އާއްމުން ފަހަތަށް ޖެހުމަށް އިންޒާރު ދެމުން.

ފުލުހުން އިންޒާރު ދިން ނަމަވެސް އާއްމުން ތިބީ ދުރަށް ޖެހޭ ގޮތަކަށް ނޫން. އާއްމުން ދަނީ ފުލުހުންނާ ދިމާލަށް ރުޅިވެރިކަން ދައްކަމުން.

ބޮޑުތަކުރުފާނުމަގުން މަޖީދީމަގަށް ވަންނަ ކަންމަތި ފުލުހުން ވަނީ ބެރިކޭޑާއި ޝީލްޑް ބޭނުންކޮށްގެން ބަންދުކޮށްފައި. އަދި އެ ސަރަހައްދުން އާއްމުން ދުރަށް ދިއުމަށް ދަނީ އިންޒާރު ދެމުން.

ފުލުހުން ދަނީ ފުލުހުންނާ ކުރިމަތިނުލަން އެއްވުމުގެ ބައިވެރިންނަށް އިންޒާރު ދެމުން.

އެމްޑީޕީގެ މުޒާހަރާގެ ބައިވެރިން މަޖީދީމަގަށް ނުކުތުމުން ފުލުހުން ބާރުގެ ބޭނުންކޮށްގެން މުޒާހަރާ ހުއްޓުވުމަށް މަސައްކަތް ފަށައިފި. މިގޮތުން އެއްވުމުގެ ތެރެއަށް ކަރުނަ ގޭސް ވެސް ފުލުހުން ދަނީ ބޭނުންކުރުމުން.