ސްރީލަންކާ ކައިރީގައި އުފެދުނު ކޮޅިގަނޑު ތޫފާން "ޑިޓްވާ" އަށް ބަދަލުވެ އެގައުމަށް ކުރަމުންދާ ވިއްސާރައިގައި މިހާތަނަށް 69 މީހުން މަރުވެ، 34 މީހުން ގެއްލިއްޖެ އެވެ.

ބޯވިއްސާރައިގެ ސަބަބުން ލަންކާގެ ބޮޑު ސަރަހައްދެއްގައި ވަނީ ފެންބޮޑުވެފަ އެވެ. އަދި ވިއްސާރައިގެ ސަބަބުން ކޯރުތައް ބަންޑުންވުމާއި ބިންގަނޑު ކަނޑައިގެން ދިއުމުގެ ގިނަ ހާދިސާތަކެއް އެ ގައުމުން ވަނީ ރިޕޯޓް ކޮށްފަ އެވެ.

ކޮލަމްބޯ ކައިރީގައި އޮންނަ އިންޑިއާ ކަނޑާ ގުޅިފައިވާ ކެލާނީ ކޯރާއި މަހާ އޮޔާ ކޯރު ކައިރީގައި ދިރިއުޅޭ ރައްޔިތުން ވީ އެންމެ އަވަހަކަށް ރައްކާތެރި ހިސާބުތަކަށް ބަދަލުކުރުމަށް އެ ގައުމުގެ ޑިޕާޓްމަންޓް އޮފް އިރިގޭޝަނުން ވަނީ އަންގާފަ އެވެ. ކޯރުތައް ބަންޑުން ވާން ފަށާފައިވާއިރު، ކޮލަމްބޯގައި ވެސް ވަނީ ވަރަށް ބޮޑަށް ފެންބޮޑުވެފަ އެވެ.

ފާއިތުވި 24 ގަޑިއިރު ތެރޭގައި ލަންކާގެ ހުރިހާ ހިސާބަކަށް ބޯކޮށް ވާރޭ ވެހިފައިވާއިރު، ބައެއް ހިސާބުތަކަށް 360 މިލިމީޓަރުގެ ވާރޭ ވެހިފައިވާ ކަމަށް ލަންކާގެ ޑިޒާސްޓާ މެނޭޖްމަންޓް ސެންޓަރުން ވަނީ ބުނެފަ އެވެ.

ތޫފާނުގެ އަސަރުކޮށް މަރުވި މީހުންގެ އަދަދު އިތުރުވެފައި މި ވަނީ ބައެއް ސަރަހައްދުތަކުގައި ބިންގަނޑު ކަނޑައިގެން ދިޔައިރު، އެތަން ތަނުގައި ތާށިވެ، ވަޅުލެވި މަރުވި މީހުންގެ ހަށިތައް ފެނުމުން ކަމަށް ޑިޒާސްޓާ މެނޭޖްމަންޓް ސެންޓަރުން ބުނެފައިވެ އެވެ. ފެންބޮޑުވުމާއި ކިސަޑު ފޭބުމުގެ ސަބަބުން 3،000 އަށް ވުރެ ގިނަ ގެއަށް ގެއްލުންވެ، 18،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފަ އެވެ.

ތޫފާން "ޑިޓްވާ" މިހާރު މިސްރާބު ޖަހާފައިވަނީ އިންޑިއާގެ ދެކުނުގެ ޓެމިލް ނާޑޫއާ ދިމާލަށް ކަމަށް އިންޑިއާގެ މޫސުމާ ބެހޭ އިދާރާ އިން ބުނެފައިވެ އެވެ. ނަމަވެސް މާދަމާގެ ނިޔަލަށް ލަންކާއަށް ތޫފާނުގެ އަސަރުކުރާނެ ކަމަށް ލަފާކޮށް ރައްކާތެރިކަމުގެ ފިޔަވަޅު އެޅުމަށް ލަންކާގެ އިދާރާތަކުން ދަނީ ހަރަކާތްތެރިވަމުންނެވެ.