ނިމި ދިޔަ އެމްޑީޕީ ސަރުކާރުން ކަނޑައަޅާފައިވާ އުސޫލުތަކާ އެއްގޮތަށް، އެ ސަރުކާރުގެ ގެދޮރުވެރިޔާ އާއި ބިންވެރިޔާ ސްކީމްގެ ދަށުން ފުލެޓަށާއި ގޯއްޗަށް ދެވަނަ ފަހަރަށް ލީ މީހުންގެ ތެރެއިން އިވެލުއޭޓްނުކުރާ ފޯމުތައް އިވެލުއޭޓްކޮށްފައި ނޫނީ، މި ސަރުކާރުގެ ސްކީމްގެ ދަށުން ފުލެޓުތައް ދޫނުކުރުމަށް، ހުޅުމާލޭގެ ތިންވަނަ ފިޔަވަހީގެ ޔޫނިއަނުން ގޮވާލައިފިއެވެ.

އެ ޔޫނިއަންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކެންދޫ ދާއިރާގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވީ، މިދިޔަ ސަރުކާރުން ގެދޮރުވެރިޔާ އާއި ބިންވެރިޔާގެ ދަށުން ހުޅުވާލި ދެވަނަ ފުރުސަތުގައި 9،000 މީހުންނަށް ފުލެޓު ދޭން އޭރު ކަނޑައެޅި ކަމަށާއި، އެ ފުރުސަތުގައި ގޯއްޗަށް ފޯމު ހުށަހެޅި މީހުންގެ ތެރެއިން 41،000 މީހުންގެ ފޯމު އޮތީ އިވެލުއޭޓްނުކޮށް ކަމަށެވެ.

އަލީ ހުސެއިން ވަނީ، މި ސަރުކާރުން މަސައްކަތްކުރަނީ ފުލެޓު ލިބޭނެ ކަމަށް ކަނޑައެޅި 9،000 މީހުންނާއި ބާކީތިބި 41،000 މީހުން މިހާރު ހިއްކަމުން އަންނަ ރަސްމާލެއަށް ފޮނުވާލަން ކަމަށް ތުހުމަތުކުރައްވައިފަ އެވެ.

އޭނާ ވިދާޅުވީ، ސަރުކާރުން 600 މިލިއަން ޑޮލަރަށް ފުށިދިއްގަރުފަޅު ހިއްކަން ހަވާލުކުރީ، 400 މިލިއަން ޑޮލަރަށް އެ މަސައްކަތްކުރެވޭނެ ކަމަށް ސަރުކާރު ހިއްސާވާ ކުންފުނި އެމްޓީސީސީން ބުނެފައި ވަނިކޮށް ކަމަށެވެ. އެކަން ކުރަނީ ސަރުކާރުން ނާޖާއިޒު ފައިދާއެއް ނެގުމުގެ މަގުސަދުގައި ކަމަށް އޭނާ ތުހުމަތުކުރެއްވި އެވެ.

އަލީ ހުސެއިން ވިދާޅުވީ، ކުރީ ސަރުކާރުގައި އޮތީ މާލެ ސަރަހައްދުން ބޯހިޔާވަހިކަން ނެތްނަމަ މާލޭން ފުލެޓު ލިބުމަށް ޝަރުތުހަމަވާ ކަމަށް ކަނޑައަޅައިފައި ކަމަށާއި، އެ އުސޫލުގެ ދަށުން ހުށަހަޅައިފައިހުރި ފޯމުތައް އަދިވެސް އިވެލުއޭޓްނުކޮށް އެބަހުރި ކަމަށެވެ.

ފާހަގަކުރެވޭ ގޮތުގައި މި ސަރުކާރުން ވަނީ މިދިޔަ ނޮވެންބަރު މަހު މެދުތެރޭ "ބޯހިޔާވަހިކަން އެންމެންނަށް"ގެ ނަމުގައި ސިޔާސަތެއް އިފުތިތާހުކޮށްފައެވެ. މި ސިޔާސަތުގެ ދަށުން މި ސަރުކާރުން 7،900 ފުލެޓު އިމާރާތްކޮށް، 15،000 ގޯތި ދޫކުރާނެ އެވެ.

އެ ސިޔާސަތުގެ ތެރެއިން މާލީ ގޮތުން ފުދުންތެރި މީހުންނަށް ހައުސިން ޔުނިޓާއި ގޯތި ގަތުމުގެ މަގުފަހި ކުރުމަށާއި މެދު ފަންތީގެ އާއިލާތަކަށް ހެޔޮ އަގުގައި، ބޯހިޔާވަހިކަން ފޯރުކޮށްދިނުމަށް އެފޯޑަބަލް ހައުސިންއަށް ޚާއްސަކޮށް ޕްރޮޖެކްޓުތައް ހިންގާނެ އެވެ.

އޭގެއިތުރަށް، އަމިއްލަ ބޯހިޔާވަހިކަމެއް ގަތުމުގެ ތަނަވަސްކަން ލިބިފައި ނެތް މީހުންނަށް "ރެންޓް ޓު އޯން" މޮޑެލްގެ ދަށުން ބޯހިޔާވަހިކަން ލިބޭނެ ގޮތާއި، ދިރިއުޅޭނެ ތަނެއް ނެތް އާއިލާތަކަށް ސަރުކާރުން ހަދާ އެސެސްމަންޓެއްގެ ތެރެއިން ބޯހިޔާވަހިކަން ލިބޭ ގޮތް ހަމަޖެހޭނެއެވެ.

މި ސިޔާސަތުގެ ދަށުން މާލޭގެ ރަށްވެހިންނާއި މާލޭގައި ދިރިއުޅޭތާ 15 އަހަރުވީ މީހުންނަށް ބޯހިޔާވަހިކަން ހަމަޖައްސައިދޭނެ އެވެ. އެ ސްކީމުގެ ތެރެއިން މާލެ ރަށްވެހިންނަށް ގޯއްޗާއި ފުލެޓް ދޫކުރާނީ މާލެ ސަރަހައްދުންނާއި ރަސްމާލެއިންނެވެ.