އީރާނަށް ދޭ ހަމަލާތަކަށް ސްޕެއިންގެ އަސްކަރީ މަރުކަޒުތައް ބޭނުންކުރުމުގެ ހުއްދަ ނުދިނުމުން އެމެރިކާގެ މަތިންދާބޯޓުތައް އެގައުމުން ފުރައިފި އެވެ

އެމެރިކާއާއި އިޒްރޭލުން އީރާނަށް ދޭން ފެށި ހަމަލާތަކާ ގުޅިގެން، ސްޕެއިންގެ ދެކުނުގައި ހުންނަ ރޯޓާ އަދި މޮރޯން އަސްކަރީ މަރުކަޒުތަކުން އެމެރިކާގެ 15 މަތިންދާބޯޓު ފުރާފައިވާކަން ފްލައިޓް ޓްރެކިންގ ވެބްސައިޓެއް ކަމަށްވާ 'ފްލައިޓްރޭޑާ24' އިން ވަނީ ދައްކާފަ އެވެ.

ސްޕެއިންގެ ފޮރިން މިނިސްޓަރު ހޯސޭ މެނުއަލް އަލްބަރޭސް ވިދާޅުވީ، ސްޕެއިންގެ ސިޔާދަތީ ބާރު ހިނގާ އެގައުމުގެ އަސްކަރީ މަރުކަޒުތައް، އީރާނަށް ހަމަލާދިނުމަށް ބޭނުންކުރުމުގެ ހުއްދަ ނުދޭނެ ކަމަށެވެ. ސްޕެއިންއިން ވަނީ އީރާނަށް ދެމުންދާ ހަމަލާތައް ކުށްވެރިކޮށްފަ އެވެ.

ފްލައިޓްރޭޑާ24 އިން ދައްކާ ގޮތުގައި، ސްޕެއިންއިން ފުރި ބޯޓުތަކުގެ ތެރެއިން މަދުވެގެން ހަތް ބޯޓެއް މިހާރު ވަނީ ޖަރުމަނުވިލާތުގެ ރާމްސްޓައިން އެއާ ބޭސްއަށް ޖައްސާފަ އެވެ.

އިނގިރޭސިވިލާތުން ކުރިން އީރާނަށް ދޭ ހަމަލާތަކުގައި އެގައުމުގެ އަސްކަރީ މަރުކަޒުތައް ބޭނުންކުރުމުގެ ހުއްދަ ދިނުމަށް ދެކޮޅުހެދި ނަމަވެސް، "އިއްތިހާދީ ދިފާއީ" ނިޒާމުގެ ދަށުން އެ މަރުކަޒުތައް ބޭނުންކުރުމުގެ ހުއްދަ ބޮޑުވަޒީރު ކިއާ ސްޓާމާ އާދީއްތަ ދުވަހު ވަނީ ދެއްވާފަ އެވެ.

ސްޕެއިންގެ ބްރޯޑްކާސްޓަރ "ޓެލެސިންކޯ" އަށް ދެއްވި ބަސްދީގަތުމެއްގައި ޚާރިޖީ ވަޒީރު އަލްބަރޭޒް ވިދާޅުވީ، މި އޮޕަރޭޝަނުގައި ސްޕެއިންގެ އެއްވެސް އަސްކަރީ މަރުކަޒެއް ބޭނުންނުކުރާ ކަމަށާއި، އެމެރިކާއާއެކު ވެފައިވާ އެއްބަސްވުމުގައި ނެތް ކަމަކަށް ނުވަތަ އދ. ގެ ޗާޓަރާއި ހިލާފު އެއްވެސް ކަމަކަށް އެ މަރުކަޒުތައް ބޭނުންކުރުމުގެ ހުއްދަ ނުދޭނެ ކަމަށެވެ.

"ފްލައިޓްރޭޑާ24" ގެ ޓްރެކިންގ ދައްކާ ގޮތުގައި، އާދީއްތަ ދުވަހު ސްޕެއިންގެ ދެކުނުގައި އޮންނަ މޮރޯން އެއަރބޭސްއިން ތެޔޮ އަޅައިދޭ ނުވަ ބޯޓެއް ޖަރުމަނާ ދިމާލަށް ދަތުރުކޮށްފައި ވެއެވެ. މީގެ އިތުރުން ރޯޓާ ކަނޑުގެ އަސްކަރީ މަރުކަޒުން ފުރި ދެ ބޯޓެއް ފްރާންސްގެ ދެކުނާ ދިމާލަށް ދަތުރުކުރިކަން އެނގޭއިރު، އެ މަރުކަޒުން ފުރި އިތުރު ހަތަރު ބޯޓެއް ދަތުރުކުރި މިސްރާބު ސާފުވާން ނެތް ކަމަށްވެސް އެ ސައިޓުން ބުނެފައި ވެއެވެ.