އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ އިންޒާރުތަކާ ހިލާފަށް ހޮރްމޫޒް ކަނޑުއޮޅިން ދަތުރުކުރި 10 އަށްވުރެ ގިނަ ތެޔޮ ޓޭންކަރަށް ހަމަލާދީފައިވާ ކަމަށް އެ ފޯސްގެ އިސް އޮފިޝަލަކު ހާމަކުރައްވައިފި އެވެ.

ބާބުލްސަރުގައި ބޭއްވި އައިއާރުޖީސީގެ ނޭވީ މުވައްޒަފުންގެ ޖަނާޒާއެއްގައި ވާހަކަދައްކަވަމުން އައިއާރުޖީސީ ނޭވީގެ ޕޮލިޓިކަލް ޑެޕިއުޓީ ކާނަލް މުހައްމަދު އަކްބަރުޒާދާ ވިދާޅުވީ، ހޮރްމޫޒް ކަނޑުއޮޅިއަކީ މިހާރު ހަނގުރާމައިގެ ސަރަހައްދެއް ކަމަށް އީރާނުން އިއުލާނުކޮށްފައިވާ ކަމަށެވެ. އަދި ދުނިޔޭގެ ޝިޕިން ނެޓްވޯކްތަކަށް އެ ސަރަހައްދުން ދަތުރު ނުކުރުމަށް އިންޒާރު ދީފައިވާނެ ކަމަށްވެސް އޭނާ ވިދާޅުވި އެވެ.

"ހޮރްމޫޒް ކަނޑުއޮޅިއަކީ ރައްކާތެރި ތަނެއް ނޫން ކަމަށް އައިއާރުޖީސީ ނޭވީން ތަކުރާރުކޮށް ދެމުންދިޔަ އިންޒާރުތަކަށް އިހުތިރާމް ނުކޮށް ދަތުރުކުރި 10 އަށްވުރެ ގިނަ ތެޔޮ ޓޭންކަރަށް އެކި ކަހަލަ ހަމަލާތައް އަމާޒުވެ، އޭގައި ވަނީ އަލިފާން ރޯވެފައި،" އަކްބަރުޒާދާ ވިދާޅުވި އެވެ.

މި ހާދިސާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލި، އެމެރިކާ އާއި ވިލާތުގެ ގައުމުތަކުގެ އިގްތިސާދަށް ބޮޑެތި ލޮޅުންތަކެއް އަރާފައިވާ ކަމަށް އޭނާ ފާހަގަކުރެއްވި އެވެ. އަދި ހަކަތައާ ބެހޭ މާހިރުންނާ ހަވާލާދީ އޭނާ ވިދާޅުވީ، މި ހާލަތު ކުރިއަށް އޮތް ތިން ހަފުތާއަށް ދެމިގެންގޮސްފިނަމަ، ދުނިޔޭގެ އިގްތިސާދު ބޮޑު ނުރައްކަލަކަށް ހުށަހެޅިގެންދާނެ ކަމަށެވެ.

އަކްބަރު ޒާދާ އިތުރަށް ވިދާޅުވީ، މިއީ އެމެރިކާގެ ރައީސް ޓްރަމްޕާއި އިޒްރޭލުގެ ބޮޑުވަޒީރު ނަތަންޔާހޫގެ "މޮޔަ" ސިޔާސަތުތަކުގެ ސަބަބުން ކުރިމަތިވި ކަމެއް ކަމަށެވެ. އީރާނުން އަބަދުވެސް ބޭނުންވަނީ ސަރަހައްދީ ހަމަޖެހުން ކަމަށާއި، ނަމަވެސް އެމެރިކާ އާއި އިޒްރޭލުން ފެށި ހަނގުރާމައިގެ ސަބަބުން ދުނިޔޭގެ އިގްތިސާދީ ހަމަޖެހުން ގެއްލިފައިވާ ކަމަށް އޭނާ ވިދާޅުވި އެވެ.

މިހާރު ހޮރްމޫޒް ކަނޑުއޮޅި އޮތީ އީރާނުގެ ކަނޑުގެ ސިފައިންގެ ފުރިހަމަ ކޮންޓްރޯލްގެ ދަށުގައި ކަމަށްވެސް އޭނާ ވަނީ ވިދާޅުވެފަ އެވެ.