އިޒްރޭލުހެ އަސްކަރިއްޔާއިން ހޮނިހިރު ދުވަހުގެ ރޭ އީރާނުގެ ތެޔޮ ރައްކާކުރާ އެތައް ތަނަކަށް ވައިގެ ހަމަލާތައް ދީ، ތެހެރާނާއި ކައިރީގައި އޮންނަ ކަރަޖް ސިޓީ ގުޑައިގެންދާ ވަރުގެ ގޮވުންތައް ގޮވައިފި އެވެ.

ސޯޝަލް މީޑިއާގައި ދައުރުވި ވީޑިއޯތަކުން ފެންނަ ގޮތުގައި ބޮޑެތި އަލިފާންގަނޑުތަކާއި ދުންގަނޑުތައް އަރަ އެވެ. އީރާނުގެ ތެލާ ބެހޭ ވުޒާރާއިން ނެރުނު ބަޔާނެއްގައި ބުނީ ތެހެރާނާއި އަލްބޮރްޒް ޕްރޮވިންސްގައި ހުރި ތެޔޮ ރައްކާކުރާ ގިނަ ޑީޕޯތަކަށް ހަމަލާ އަމާޒުވެފައިވާ ކަމަށެވެ.

އިޒްރޭލު އަސްކަރިއްޔާއިން ނެރުނު ބަޔާނެއްގައި ބުނީ ތެހެރާނުގައި ހުރި ތެޔޮ ރައްކާކުރާ އަދި ހަކަތައިގެ ކޮމްޕްލެކްސްތަކަކަށް ހަމަލާ ދީފައިވާ ކަމަށާއި، އެ ތަންތަން ބޭނުންކުރަމުން ދިޔައީ އީރާނުގެ ހަތިޔާރު އެޅި ފައުޖުތަކުން ކަމަށެވެ. އިޒްރޭލުން އެ ހަމަލާ ސިފަކުރީ ސަރުކާރުގެ އަސްކަރީ އިންފްރާސްޓްރަކްޗާ ނައްތާލުމަށް އަމާޒުކުރި "މުހިންމު ހަމަލާއެއް" ގެ ގޮތުގަ އެވެ.

ތެހެރާނުގެ ދެކުނުގައި އޮންނަ ޝަހްރެ ރޭ ޑިސްޓްރިކްޓްގައި ހަމަލާ އަމާޒުވި ތެޔޮ މަރުކަޒު ހުރީ ތެހެރާނުގެ މައި ތެޔޮ ސާފުކުރާ ކާރުޚާނާ ކައިރީގައި ކަމަށް އީރާނުގެ ދައުލަތުގެ މީޑިއާއިން ރިޕޯޓުކުރެ އެވެ. އީރާނުގެ މީޑިއާ އާއި ރައްޔިތުން ރިޕޯޓުކުރާ ގޮތުގައި ހަމަލާތަކުގެ ސަބަބުން ގެތަކާއި ފިހާރަތަކާއި މަގުތަކާއި ފެން ހޮޅިތަކުގެ އިތުރުން ހޮސްޕިޓަލްތަކާއި ސްކޫލްތަކަށް ވެސް ބޮޑެތި ގެއްލުންތައް ލިބިފައި ވެއެވެ.

މި ހަމަލާތަކަކީ މިދިޔަ ހަފުތާ ބަންދުގައި އެމެރިކާ އާއި އިޒްރޭލު ގުޅިގެން އީރާނަށް ދޭން ފެށި ހަމަލާތަކުގެ ތެރެއިން، އީރާނުގެ ހަކަތައިގެ އިންފްރާސްޓްރަކްޗާއަށް އަމާޒުކުރި ފުރަތަމަ ހަމަލާތައް ކަމަށް ރިޕޯޓުތައް ބުނެ އެވެ. އޭގެ ކުރިން ހަމަލާތައް މައިގަނޑު ގޮތެއްގައި އަމާޒުކޮށްފައި ވަނީ އީރާނުގެ ލީޑާޝިޕާއި ސެކިއުރިޓީ ޚިދުމަތްތަކާއި ފުލުހުންގެ ސްޓޭޝަންތަކަށާއި، މިސައިލް އުފެއްދުމާއި ނިއުކްލިއާ ހަތިޔާރު އުފެއްދުމުގެ ޤާބިލުކަން ނައްތާލުމަށެވެ.