އިސްލާމްދީނުގެ އެންމެ މުގައްދަސް ބިނާ ކަމުގައިވާ ކައުބަތުﷲ ގެފުޅު ހުންނަ މައްކާގެ މަސްޖިދުލް ހަރަމްއަކީ ކޮންމެ އަހަރަކު އެތައް މިލިއަން މުސްލިމުންނެއް ހައްޖާއި އުމްރާގެ އަޅުކަން އަދާ ކުރުމަށް ޖަމާވާ ބިމެކެވެ. އެހެން ކަމުން މި މާތް މިސްކިތަށް އަންނަ މެހެމާނުންނަށް އެންމެ ރަނގަޅު ހިދުމަތެއް ދިނުމަށްޓަކައި ގިނަ އިންތިޒާމްތަކެއް ހުރެ އެވެ.
ހާއްސަކޮށް ހޫނު މޫސުމުގެ ދުވަސްވަރު މައްކާގެ ހޫނުމިން 45 ޑިގްރީ ސެލްސިއަސްއަށް ވުރެ މައްޗަށް ދާއިރު، އަޅުކަން ކުރަން އަންނަ މީހުންނަށް މި ގަދަ ހޫނުން ސަލާމަތްވެ، އަރާމު މާޙައުލެއްގައި އަޅުކަން ކުރެވޭނެ އިންތިޒާމުތައް ވަނީ އެންމެ ފުރިހަމައަށް ހަމަޖައްސާފަ އެވެ.
ބޭރުގެ ހޫނުމިން ކިތަންމެ މަތިވި ނަމަވެސް ހަރަމްފުޅުގެ އެތެރޭގެ ފިނި ހޫނުމިން އަބަދުވެސް 24 ޑިގްރީ ސެލްސިއަސްގައި ހިފެހެއްޓި ފައިވާނާ ނުލައި ހިނގާ އުޅެވޭ ވަރަށް ތަޅުންގަނޑު ފިނިކޮށް އޮވެ އެވެ.
155,000 ޓަނުގެ ބިޔަ ކޫލިން ސިސްޓަމް
މަސްޖިދުލް ހަރަމްގެ އެތެރޭގެ ފިނި ހޫނުމިން އެއްވަރެއްގައި ހިފެހެއްޓުމަށްޓަކައި ދުނިޔޭގެ އެންމެ ބޮޑު އަދި އެންމެ ޒަމާނީ އެއް ފިނިކުރާ ނިޒާމު ހަރަމްފުޅުގައި ދަނީ ބޭނުން ކުރަމުންނެވެ. މި ނިޒާމުގެ ޖުމްލަ ކެޕޭސިޓީއަކީ 155,000 ޓަނެވެ.
މި ބިޔަ އެއާކޮންޑިޝަން ނިޒާމުގެ ދަށުން ހަރަމްފުޅާ ތަންކޮޅެއް ދުރުގައި ހުންނަ ދެ ބޮޑު މަރުކަޒަކުން ފިނި ފެން ހޮޅިތަކުގެ ޒަރީއާއިން ހަރަމްފުޅަށް ފެން ފޮނުވައިދެ އެވެ.
ހަރަމްފުޅުގެ އެކި ސަރަހައްދުތަކަށް ފިނިވައި ފެތުރުމަށްޓަކައި ހާއްސަ އެއާ ހޭންޑްލިންގް ޔުނިޓްތައް ބޭނުންކުރެ އެވެ. މީގެ ސަބަބުން ބޭރުގެ ހޫނުމިން ކިތަންމެ މަތިވި ނަމަވެސް، އެތެރޭގެ ފިނިމިން އަބަދުވެސް ހުންނަނީ ބަދަލުވުމެއް ނެތި 24 ޑިގްރީގަ އެވެ.
ފައިވާން ނެތި ހިނގާލެވޭ ފިނި މާބަލް ތަޅުންގަނޑުގެ ސިއްރު
ގެފުޅު ވަށައިގެން ތަވާފުކުރާ ސަރަހައްދުގައި އަޅާފައިވާ ހުދު ކުލައިގެ މާބަލްއަކީ ހައްޖާޖީންގެ ސަމާލުކަން އެންމެ ބޮޑަށް ހުއްޓޭ އެއް ކަމެވެ.
އަވީގެ ސަބަބުން ބޭރުގެ އެހެން ތަޅުންތައް ފައި ފިހޭ ވަރަށް ހޫނުވާއިރު ވެސް، މި މާބަލްމަތީގައި ފައިވާނާ ނުލައި ހިނގާއިރު އިހުސާސްވަނީ ހިތްގައިމު ފިނި ކަމެކެވެ.
މިއީ އެއްވެސް ކަހަލަ އިލެކްޓްރިކް ފިނިކުރާ ހޮޅިއެއް ތަޅުންގަނޑުގެ ދަށުގައި ވަޅުލައިގެން ކުރާ ކަމެއް ނޫނެވެ. މީގެ އަސްލު ސިއްރަކީ ޔޫނާންގެ 'ތާސޯސް' ކިޔާ ރަށަކުން އެތެރެކުރާ ހާއްސަ މަދުން ނޫނީ ނުފެންނަ މާބަލް އެކެވެ. މިއީ ދުނިޔޭގައި ލިބެން ހުރި އެންމެ ހުދު އަދި އެންމެ ސާފު މާބަލްގެ ބާވަތެވެ.
މި މާބަލްގެ ޚާއްޞަ ސިފަތަކުގެ ތެރޭގައި
- ހޫނު ރިފްލެކްޓްކުރުން: މި މާބަލްގެ ކުލަ އާދަޔާ ޚިލާފަށް ހުދު ކަމުން، އޭގެ މައްޗަށް އެޅޭ އިރުގެ ދޯދިތަކާއި ހޫނު އެތެރެއަށް ދަމައިގަތުމުގެ ބަދަލުގައި އަނބުރާ ފޮނުވައިދެ އެވެ.
- ޤުދުރަތީ ފިނިކަން ހިފެހެއްޓުން: ރޭގަނޑުގެ ވަގުތުތަކުގައި ވައިގެ ތެރޭގައި ހުންނަ ތެތްކަން މި މާބަލްގެ ކުދިކުދި ބާ ގަނޑުތަކުން ދަމައިގަނެ އެވެ. އަދި ދުވާލު އިރުގެ ހޫނު ގަދަވުމުން، އެ ތެތްކަން މަޑުމަޑުން ބޭރުވެ، 'އިވެޕަރޭޓިވް ކޫލިންގ' އެފެކްޓެއް އުފެދި ތަޅުންގަނޑު ފިނިކޮށްދެ އެވެ.
- ބޯ މިން: މި ތަޅުމުގައި އަޅާފައިވާ ކޮންމެ މާބަލް ފޮތިއެއްގެ ބޯމިނުގައި ގާތްގަނޑަކަށް 5 ސެންޓިމީޓަރު ހުރެ އެވެ. މިއީ ބިމުގެ އަޑިން ހޫނު ދަތުރު ކުރުން ހުއްޓުވައިދޭ ކަމެކެވެ.
އަޅުކަންކުރާ މީހުންނަށް ދެވޭ އަހައްމިއްޔަތުކަން
ސައުދީ އަރަބިއްޔާގެ ސަރުކާރުން ދަނީ ދެ ހަރަމްފުޅުގެ އިންޖިނިއަރިންގް އަދި މެއިންޓެނަންސްގެ ކަންކަން ވަރަށް މަތީ ފެންވަރެއްގައި ބަލަހައްޓަމުންނެވެ. ފިނިކުރާ ނިޒާމުތަކުގެ ފިލްޓަރުތައް ސާފުކުރުމާއި މާބަލްތައް އަބަދު އޮމާންކޮށް ބެލެހެއްޓުމަކީ 24 ގަޑިއިރު ހުއްޓުމެއްނެތި ކުރިއަށްދާ މަސައްކަތްތަކެވެ.
މީގެ އިތުރުން ގަދަ ހޫނުން ރައްކާތެރިވުމަށްޓަކައި ހަރަމްފުޅުގެ ބޭރުގެ ސަރަހައްދުތަކުގައި ފިނިފެން ބުރުއްސާ ބޮޑެތި ފަންކާތަކާއި، ބިޔަ ކުޑަތައް ވެސް ވަނީ ހަރުކުރެވިފަ އެވެ.
މި ހުރިހާ ވަސީލަތްތަކެއްގެ ސަބަބުން، ދުނިޔޭގެ އެކި ކޮޅުތަކުން އަންނަ އެތައް މިލިއަން މުސްލިމުންނަށް މައްކާގެ ސަހަރާގެ ގަދަ ހޫނުގެ އެއްވެސް އުނދަގުލަކާ ނުލައި، މަސްޖިދުލް ހަރަމްގެ ރޫހާނީ އަދި ފިނި މާހައުލެއްގައި ހިތްހަމަޖެހުމާއެކު އަޅުކަން އަދާކުރުމުގެ ފުރުސަތު ލިބިގެންދެ އެވެ.
