ރާއްޖޭގައި ނުރައްކާތެރި ކެމިކަލް ވިއްކުމުގެ ވިޔަފާރިކުރާ ފަރާތްތަކުން ނަގަންޖެހޭ ހާއްސަ ހުއްދަ ނެގުމަށާއި، އެފަދަ ތަކެތި ރައްކާކުރާ ތަންތަން ރަޖިސްޓްރީ ކުރުމަށް ދީފައިވާ މުއްދަތު މިނިސްޓްރީ އޮފް ޑިފެންސުން އިތުރު އެއް މަސް ދުވަހަށް އިތުރުކޮށްދީފި އެވެ.

ނުރައްކާތެރި ކެމިކަލާ ބެހޭ ގަވާއިދުގެ ދަށުން، "ކެމިކަލް ވިއްކުމުގެ ހުއްދަ" ނެގުމަށާއި ކެމިކަލް ރައްކާކުރާ ތަންތަން 'މަކުޑި' ޕޯޓަލް މެދުވެރިކޮށް ރަޖިސްޓްރީ ކުރުމަށް ކުރިން ދިން މުއްދަތު ވަނީ ހަމަވެފަ އެވެ. ނަމަވެސް އެ މުއްދަތުގައި ހުއްދައަށް އެދުނު ފަރާތްތަކުގެ އަދަދު ނިސްބަތުން މަދުކަމަށް ފާހަގަކުރެވިފައިވާތީ، ޑިފެންސް މިނިސްޓްރީން ވަނީ އިތުރު ފުރުސަތެއް ދިނުމުގެ ގޮތުން މިއަދުން ފެށިގެން އެއް މަސް ދުވަހުގެ މުއްދަތެއް ދޭން ނިންމާފަ އެވެ.

ޑިފެންސް މިނިސްޓްރީން ނެރުނު އިއުލާނެއްގައި ބުނެފައިވާ ގޮތުގައި، އިތުރުކޮށްދިން މުއްދަތުގެ ތެރޭގައި ރަޖިސްޓްރީ ނުކޮށް ކެމިކަލްގެ ވިޔަފާރިކުރާ ފަރާތްތަކާމެދު ގަވާއިދުގެ ދަށުން ހަރުކަށި ފިޔަވަޅުތަކެއް އެޅޭނެ އެވެ. އެގޮތުން، ގަވާއިދާ ހިލާފުވާ ފަރާތްތަކަށް ރާއްޖެއަށް ކެމިކަލް އެތެރެކުރުމުގެ ހުއްދަ އިތުރަށް ނުދިނުމުގެ އިތުރުން، 50،000 ރުފިޔާއާއި 1،000،000 (އެއް މިލިއަން) ރުފިޔާއާ ދެމެދުގެ އަދަދަކުން ޖޫރިމަނާކުރުމާއި، ތަކެތި އަތުލައިގަތުމާއި، ވިޔަފާރި ހުއްދަ ބާތިލުކުރުން އަދި ޖިނާއީ ދައުވާ އުފުލުން ހިމެނެ އެވެ.

މާލެ ސަރަހައްދުގައި ސަލާމަތީ މިންގަނޑުތަކާ ހިލާފަށް އަދި ސިއްރިއްޔާތުގައި ކެމިކަލް ގުދަންކުރުމުގެ ސަބަބުން މީގެ ކުރިން ނުރައްކާތެރި ހާދިސާތަކެއް ވަނީ ހިނގާފަ އެވެ. އެގޮތުން 2019 ވަނަ އަހަރުގެ ސެޕްޓެންބަރު މަހު ހެންވޭރު އަބަދަށްފެހި މަގުގައި ހުރި ކެމިކަލް ގުދަނެއްގައި ހިނގި ނުރައްކާތެރި އަލިފާނުގެ ހާދިސާގައި މީހަކު ނިޔާވެ، އާންމުންގެ އެތައް ގެދޮރަކަށާއި މުދަލަކަށް ބޮޑެތި ގެއްލުންތަކެއް ލިބުނެވެ. އެ ހާދިސާއާ ގުޅިގެން މާލޭގައި ހުރި 40 އެއްހާ ކެމިކަލް ގުދަން ތިލަފުއްޓަށް ބަދަލުކުރެވުނެވެ.

އޭގެ ފަހުންވެސް، 2023 ވަނަ އަހަރު ލިލީ މަގުގައި ގަވާއިދާ ހިލާފަށް ހިންގި ކެމިކަލް ގުދަނެއް ފެނިގެން ބަންދުކޮށްފައިވާއިރު، މިއަހަރުގެ ތެރޭގައިވެސް މާފަންނުގައި ގަސް ހެއްދުމަށް ބޭނުންކުރާ ކެމިކަލް ގުދަނެއްގައި އަލިފާނުގެ ހާދިސާއެއް ވަނީ ހިނގާފަ އެވެ.

ތަފާސްހިސާބުތަކަށް ބަލާއިރު މާލޭގައި މިހާރުވެސް ކެމިކަލް ގުދަންކުރާ 144 ތަނަކާއި، އެފަދަ ތަކެތި ވިއްކާ 62 ފިހާރައެއް އެބަހުއްޓެވެ. މީހުން ދިރިއުޅޭ އިމާރާތްތަކުގަޔާއި ފިހާރަތަކުގެ ގުދަންތަކުގައި ގަވާއިދާ ހިލާފަށް އެއްވެސް ބާވަތެއްގެ ކެމިކަލެއް ރައްކާކޮށްފައިވާނަމަ، އެކަން ލަސްނުކޮށް އެމްއެންޑީއެފް ނުވަތަ ފުލުހުންނަށް ރިޕޯޓުކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފަ އެވެ.