ރާއްޖޭގެ ޓެކްސް ނިޒާމަށް ގެންނަން ނިންމާފައިވާ ބަދަލުތަކާ ގުޅިގެން، ބޭރުގެ ގިނަ އަދަދެއްގެ ޓުއާ އޮޕަރޭޓަރުން ރާއްޖެއަށް ފަތުރުވެރިން ފޮނުވުމާއި އާ ބުކިންތައް ނެގުން ވަގުތީ ގޮތުން ހުއްޓާލަން ނިންމައިފި އެވެ.

މި ނިންމުންތަކުގެ މައިގަނޑު ސަބަބަކީ، ރާއްޖެއަށް ފަތުރުވެރިން ގެންނަ ބޭރުގެ ކުންފުނިތަކުން ފޯރުކޮށްދޭ އެޖެންސީ އަދި ބުކިން ހިދުމަތްތަކުންނާއި ފަތުރުވެރިކަމުގެ އުފެއްދުންތަކުން 17 އިންސައްތައިގެ ޓީޖީއެސްޓީ (ޓޫރިޒަމް ގުޑްސް އެންޑް ސާވިސަސް ޓެކްސް) އެއް ނެގުމަށް ނިންމާފައިވުމެވެ.

މި ޓެކްސްއަށް އަމަލުކުރަން ފެށުމަށް ހަމަޖެހިފައިވަނީ 1 އޮކްޓޫބަރު 2026 އިން ފެށިގެންނެވެ. އެހެންކަމުން، މި ތާރީހު އައުމުގެ ކުރިން ބޭރުގެ ބައެއް ޓުއާ އޮޕަރޭޓަރުން ވަނީ ރާއްޖެ އިސްތިހާރުކުރުމާއި ވިއްކުމާ މެދު އަލުން ވިސްނައި، ގޮތްތަކެއް ނިންމަން ފަށާފަ އެވެ.

މިއާއެކު ބައެއް ކުންފުނިތަކުން ރާއްޖެއަށް އާ ބުކިން ހެދުމާއި ޕްރޮމޯޓްކުރުން މިހާރު ވަނީ މެދުކަނޑާލާފަ އެވެ. ޓުއާ އޮޕަރޭޓަރުން ހާމަކުރާ ގޮތުގައި، ރާއްޖެ އަލުން ވިއްކަން ފަށާނީ ކަމާބެހޭ ފަރާތްތަކުން އަމަލުކުރެވޭނެ ސާފު އުސޫލެއް ކަނޑައެޅުމުންނެވެ. ވަކިން ހާއްސަކޮށް، ރާއްޖޭގެ އެތެރޭގެ އެއްވެސް ޓެކްސްއެއް ސީދާ ބޭރުގެ ޓްރެވަލް ކުންފުނިތަކުން ދައްކަން ނުޖެހޭ ގޮތަށް، ޑީއެމްސީ ނުވަތަ ސަޕްލަޔަރުންގެ އިންވޮއިސްގެ ތެރެއިން އެކަން ހަމަޖެހޭނެ ނިޒާމެއް ގާއިމުވުމުން ކަމަށް އެފަރާތްތަކުން ބުނެ އެވެ.

ޓުއާ އޮޕަރޭޓަރުން އެއްބަސްވާ ގޮތުގައި މި އިސްލާހުތަކާ އެކު ކުރިއަށް ދިއުމަކީ ދަތި ކަމެކެވެ. އެހެންކަމުން ގިނަ ފަރާތްތަކުން ވަނީ ފަތުރުވެރިންނަށް ރާއްޖެ ވިއްކުން ހުއްޓާލުމަށް ނިންމާފަ އެވެ. މިކަމާ ގުޅިގެން ބޭރުގެ އެޖެންޓުންގެ ފަރާތުން ބޮޑެތި ކަންބޮޑުވުންތަކެއް ވަނީ ފާޅުކޮށްފަ އެވެ.

ގާނޫނަށް ގެނައި އިސްލާހަށް އަމަލުކުރުން ފަސްކޮށްދިނުމަށް ނުވަތަ އެ އިސްލާހު އަނބުރާ ގެންގޮސްދިނުމަށް ޔޫރަޕުގެ ޓުއާ އޮޕަރޭޓަރުން މީގެ ކުރިން ވަނީ ގޮވާލާފަ އެވެ.

ޖީއެސްޓީ ގާނޫނަށް 8 ވަނަ އިސްލާހު ގެނައުމުގެ ބިލު ރައީސް ތަސްދީގުކުރެއްވީ 31 އޮގަސްޓުގަ އެވެ. ޖީއެސްޓީ ގާނޫނަށް ގެނައި އިސްލާހު ގެނެސްފައިވަނީ ރާއްޖޭގައި ޑެސްޓިނޭޝަން ޕްރިންސިޕަލް ތަންފީޒުކުރަން ފެށުމަށް އޮފް ޝޯ ބުކިން ޕްލެޓްފޯމުތަކާއި ބޭރުގެ ޓްރެވަލް އެޖެންޓުންނާއި ޓުއާ އޮޕަރޭޓަރުންގެ އަތުން ޓެކްސް ނެގުމަށެވެ.