މަގުމަތީގެ އާންމު އުސޫލުތަކާއި ޓްރެފިކް ގާނޫނުތަކާ ތަކުރާރުކޮށް ހިލާފުވާ މީހުންނާ މެދު "އެންމެ މަތީ ދަރަޖައިގައި" ހަރުކަށި ފިޔަވަޅުތައް އަޅަން ފުލުހުންގެ އެކި ސެކްޝަންތަކަށް ޕޮލިސް ކޮމިޝަނަރު އަހުމަދު މުހައްމަދު އަންގަވައިފި އެވެ.

މާލޭގައި ނުރައްކާތެރިކޮށް ދުއްވި ސައިކަލެއް އެކްސިޑެންޓްވެ ޒުވާން އަންހެނަކު ނިޔާވި ހާދިސާއާ ގުޅިގެން ޕޮލިސް ކޮމިޝަނަރު ނެރުއްވި މެސެޖެއްގައި ވިދާޅުވީ މަގުމަތީގެ އަމާންކަން ބެލެހެއްޓުމަށް ހާއްސަ ފިޔަވަޅުތަކެއް އަޅަން ނިންމާފައިވާ ކަމަށެވެ. އެ ފިޔަވަޅުތައް ވަގުތުން ތަންފީޒު ކުރަން ފަށާފައިވާ ކަމަށްވެސް ވިދާޅުވި އެވެ.

މި ފިޔަވަޅުތައް ގްރޭޓާ މާލެ އޭރިއާގެ އިތުރުން އަތޮޅުތެރޭގެ ރަށްރަށުގައިވެސް އަޅަމުންދާނެ ކަމަށް ޕޮލިސް ކޮމިޝަނަރު ވިދާޅުވި އެވެ.

އެކަމުގައި ރައްޔިތުންގެ އެއްބާރުލުން ބޭނުންވާ ކަމަށް ވެސް ޕޮލިސް ކޮމިޝަނަރު ވިދާޅުވި އެވެ.

މި ފިޔަވަޅުތަކުގެ މަގުސަދަކީ މަގުމަތީގެ ރައްކާތެރިކަން އެންމެންނަށް ކަށަވަރުކޮށްދިނުން ކަމަށާއި މަދު ބައެއްގެ ސަބަބުން ތަކުރާރުކޮށް ހިނގާ ނުރައްކާތެރި ހާދިސާތައް ހުއްޓުވުމަށް ގާނޫނީ ގޮތުން އެޅެން ހުރި އެންމެ ހަރުކަށި ފިޔަވަޅުތައް އަޅުއްވާނެ ކަމަށް ވެސް ވިދާޅުވި އެވެ.

ސޯސަންމަގުގައި ދެ ސައިކަލު ޖެހި ހިނގި ނުރައްކާތެރި އެކްސިޑެންޓެއްގައި ނިޔާވީ ށ. ފޯކައިދޫ، މަގުމަތީގޭ، އާއިޝަތު މާހިދާ، 26، އެވެ.

އެ މައްސަލައާ ގުޅިގެން ފުލުހުން ވަނީ ތ. ދިޔަމިގިލި، އައްސޭރި، މާހު ހަސަން، 21، ހައްޔަރުކޮށްފައެވެ. ތަހުގީގުގެ ބޭނުމަށް އޭނާގެ ބަންދަށް ކޯޓުން ވަނީ 15 ދުވަސް ދީފަ އެވެ.

ފުލުހުން ކޯޓުގައި ބުނެފައިވާ ގޮތުގައި މާހުއަކީ ލައިސަންސް ނެތި ދުއްވައިގެން މި އަހަރުގެ ތެރޭގައިވެސް ހަތަރު ފަހަރަށް ހިފަހައްޓައި ޖޫރިމަނާކޮށްފައިވާ މީހެކެވެ. ކްރިމިނަލް ކޯޓުން ނެރުނު ކޯޓު އަމުރުން އެނގޭ ގޮތުގައި އެކްސިޑެންޓް ހިނގާފައިވަނީ ބާރު ސްޕީޑްގައި ޒިގްޒެގްކޮށް ދުއްވަނިކޮށް މާހިދާ އިން ސައިކަލުގައި ޖެހިގެންނެވެ.