ޣައްޒާގެ އުތުރުގައި ހަރަކާތްތެރިވާ ހަމާސްގެ އަސްކަރީ ވިންގްގެ އިސްވެރިޔާ އިއްޒުއްދީން އަލްބައިކް، އިޒްރޭލުން ދިން ވައިގެ ހަމަލާއެއްގައި ޝަހީދުވެފައިވާ ކަމަށް ފަލަސްތީނާއި އިޒްރޭލުގެ އޮފިޝަލުން ކަށަވަރުކޮށްދީފި އެވެ.

އަލްބައިކް ޝަހީދުވީ އަންގާރަ ދުވަހުގެ ފަތިހުގެ ވަގުތެއްގައި ޣައްޒާ ސިޓީގެ އައްނަސްރު އަވަށުގައި ހުރި އެޕާޓްމަންޓް އިމާރާތަކަށް އިޒްރޭލުން ދިން ހަމަލާއެއްގަ އެވެ. ހަމާސް ޖަމާއަތުން ނެރުނު ބަޔާނެއްގައި އޭނާ ޝަހީދުވިކަން ވަނީ ކަށަވަރުކޮށްދީފަ އެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ޑިފެންސް މިނިސްޓަރު އިސްރާއީލް ކަޓްޒް އެކްސްގައި ނެރުނު ގުޅިފައިވާ ބަޔާނެއްގައި ވެސް އަލްބައިކް މަރާލާފައިވާ ކަމަށް ބުނެފައިވެ އެވެ.

އަލްޝިފާ ހޮސްޕިޓަލުން މައުލޫމާތު ދޭ ގޮތުގައި މި ހަމަލާގައި ލިބުނު އަނިޔާތަކަށް ފަރުވާ ދެމުން ދަނިކޮށް އިތުރު މީހަކު ވެސް ވަނީ މަރުވެފަ އެވެ.

އަލްބައިކް އަކީ އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގެ ތެރޭގައި، ކުރީގެ ސީނިއާ ކޮމާންޑަރު އަހުމަދު އަލްޣަންދޫރުގެ ބަދަލުގައި އުތުރު ޣައްޒާގެ ގައްސާމް ބްރިގޭޑްސްގެ ކޮމާންޑަރުކަމާ ހަވާލުވި ފަރާތެވެ.

މި ހަމަލާ ދީފައިވަނީ ފާއިތުވި ހަފުތާތަކުގައި އިޒްރޭލުން ހަމާސްއަށް އަމާޒުކޮށް ދޭ ހަމަލާތައް ވަރުގަދަކޮށްފައިވާ ދަނޑިވަޅެއްގަ އެވެ.

އިޒްރޭލު ސިފައިން ބުނާ ގޮތުގައި މި މަހުގެ ތެރޭގައި އެކަނިވެސް ހަމާސްގެ މަދުވެގެން 20 މެންބަރުން ވަނީ މަރާލާފަ އެވެ. މީގެ ތެރޭގައި ބައެއް ސީނިއާ ކޮމާންޑަރުންނާއި، 2023 އޮކްޓޯބަރު 7 ގައި ދިން ހަމަލާގައި ބައިވެރިވި ކަމަށް ނުވަތަ އަސީރުން ހިފެހެއްޓުމުގައި ބައިވެރިވި ކަމަށް އިޒްރޭލުން ތުހުމަތުކުރާ މީހުން ހިމެނެ އެވެ.

އެމެރިކާގެ ތާއީދާއެކު މިދިޔަ އޮކްޓޯބަރު މަހު ދެފަރާތުން އެއްބަސްވި ހަނގުރާމަ ހުއްޓާލުމުގެ އެއްބަސްވުމަށް އިޒްރޭލުން ހުރަސްއަޅަމުންދާ ކަމަށް ހަމާސްއިން ވަނީ ތުހުމަތުކޮށްފަ އެވެ.

މި އެއްބަސްވުމުގައި ޣައްޒާ އަލުން އާރާސްތުކުރުމަށް ގޮވާލާފައިވީ ނަމަވެސް، ހަމާސްއިން ހަތިޔާރު އެޅުމާއި އިޒްރޭލު ސިފައިން ފޭބުމުގެ ޝަރުތުތަކާ މެދު އެއްބަސްވުމަކަށް ނާދެވުމުގެ ސަބަބުން އެދެވޭ ކުރިއެރުމެއް ލިބިފައެއް ނުވެ އެވެ.

ޣައްޒާގެ ސިއްހީ ވުޒާރާއިން ހާމަކުރާ ގޮތުގައި ހަނގުރާމަ ހުއްޓާލުމުގެ އެއްބަސްވުން އަމަލީ ގޮތުން ފެށުނު ފަހުން ވެސް އިޒްރޭލުގެ ހަމަލާތަކުގައި 1,400 އަށްވުރެ ގިނަ ފަލަސްތީނު މީހުން ވަނީ ޝަހީދުވެފަ އެވެ. ހަމަ އެއާއެކު، އިޒްރޭލު ސިފައިންގެ ހަތަރު މީހަކު މަރުވެފައިވާ ކަމަށް އެ ގައުމުގެ އަސްކަރިއްޔާއިން ބުނެ އެވެ.

ފަލަސްތީނުގެ ކަމާބެހޭ ފަރާތްތަކުން ބުނާ ގޮތުގައި 2023 އޮކްޓޯބަރު މަހުން ފެށިގެން އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި މިހާތަނަށް 74,000 އަށްވުރެ ގިނަ މީހުން ވަނީ ޝަހީދުވެފަ އެވެ.