ރާއްޖޭގައި ބަންދުކޮށްފައި ހުރި މިސްރުގެ ޑޮކްޓަރެއް ކަމަށްވާ ޕީޓާ ސަމާން މަރްޒޫކް މިނިވަންކޮށް، އޭނާ އަނބުރާ ގައުމަށް ފޮނުވާލުމުގެ ކަންކަން ހަމަޖައްސާފައިވާ ކަމަށް މިސްރުގެ ފޮރިން މިނިސްޓްރީން އިއުލާނުކޮށްފި އެވެ.

މިސްރުގެ މިނިސްޓަ އޮފް ފޮރިން އެފެއާޒް، އިންޓަނޭޝަނަލް ކޯޕަރޭޝަން އެންޑް އިޖިޕްޝަން އެކްސްޕެޓްރިއޭޓްސް، ބަދުރު އަބްދުލްއާތީ ވަނީ ރާއްޖެއަށް ކަނޑައަޅާފައި ހުންނަ އަދި ސްރީލަންކާގައި ގާއިމުވެފައިވާ މިސްރުގެ އެމްބަސީ މެދުވެރިކޮށް ދިވެހި ސަރުކާރުގެ ކަމާބެހޭ އިދާރާތަކާ އަވަސް މުއާމަލާތްތަކެއް ކުރުމަށް އަންގަވާފަ އެވެ. އެއީ ޕީޓާ ސަމާން މަރްޒޫކް މިނިވަންކުރުމުގެ މަސައްކަތް އަވަސްކުރުމަށާއި އޭނާއަށް ބޭނުންވާ ކޮންސިއުލާ އެހީތެރިކަން ފޯރުކޮށްދިނުމަށެވެ.

މި މައްސަލައިގައި ހިނގަމުންދިޔަ ކަންކަމާއި އޭނާ މިނިވަންކޮށް އަނބުރާ ގައުމަށް ގެންދިއުމަށް ކުރެވެމުންދިޔަ މަސައްކަތްތަކުގެ އެންމެ ފަހުގެ މައުލޫމާތު ހިއްސާކުރުމަށް، އެ މިނިސްޓްރީގެ ކޮންސިއުލާ ސެކްޓަރުން ދިޔައީ އޭނާގެ އާއިލާއާ ގަވާއިދުން މުއާމަލާތް ކުރަމުންނެވެ.

މި މަސައްކަތްތަކުގެ ތެރެއިން، އެސިސްޓަންޓް ފޮރިން މިނިސްޓަ ފޯ ކޮންސިއުލާ އެފެއާޒް އެންޑް އިޖިޕްޝަންސް އެބްރޯޑް، އެމްބަސެޑަރު ހައްދާދު އަބްދުލް ތައްވާބު އަލް-ޖައުހަރީ ވަނީ ރާއްޖޭގެ ފޮރިން މިނިސްޓްރީގެ ކޮންސިއުލާ ޑިޕާޓްމަންޓުގެ އިސްވެރިޔާއާ ބައްދަލުކުރައްވައި ގިނަ މަޝްވަރާތަކެއް ބާއްވާފަ އެވެ.

އެ ބައްދަލުވުންތަކުގައި އަލް-ޖައުހަރީ ވަނީ ބަންދުގައި ހުރި މިސްރުގެ ރައްޔިތާއެކު ރަނގަޅު ގޮތުގައި މުއާމަލާތްކުރުން ކަށަވަރުކުރުމަށާއި، އޭނާގެ މައްސަލަ ވީހާވެސް އަވަހަކަށް ހައްލުކޮށް މިނިވަންކުރުމުގެ މުހިންމުކަމުގެ މައްޗަށް ބާރުއަޅުއްވާފަ އެވެ.

މި ސިލްސިލާ މަޝްވަރާތަކުގެ ނަތީޖާއެއްގެ ގޮތުން، އޭނާ މިނިވަންކޮށް އަނބުރާ ގައުމަށް ފޮނުވާލުމަށް ދިވެހި ސަރުކާރުން އެއްބަސްވި ކަމަށް މިސްރުގެ ފޮރިން މިނިސްޓްރީން ބުނެ އެވެ.

ޕީޓާ ސަމާން މަރްޒޫކް އެނބުރި މިސްރަށް ދިއުމުން، އަލް-ޖައުހަރީ ވަނީ އެ ގައުމުގެ ފޮރިން މިނިސްޓްރީގައި އޭނާއާއި އޭނާގެ އާއިލާއާ ބައްދަލުކުރައްވާފަ އެވެ.

މި މައްސަލަ ހައްލުކޮށް، އޭނާ ރައްކާތެރިކަމާއެކު އަނބުރާ ގައުމަށް ގެނައުމަށް ފޮރިން މިނިސްޓްރީއާއި ކަމާބެހޭ އިދާރާތަކުން ކުރި މަސައްކަތްތަކަށްޓަކައި، އޭނާގެ އާއިލާއިން ވަނީ އެ ސަރުކާރަށް ޝުކުރު އަދާކޮށްފަ އެވެ.