މޯލްޑިވްސް ހައްޖު ކޯޕަރޭޝަނުން ހުޅުމާލޭގައި ތަރައްގީކުރާ ރިއަލް އެސްޓޭޓް މަޝްރޫއު "ނިއާމް ރެސިޑެންސް"ގެ އަގުބޮޑު ޕެންޓްހައުސްތައް، އެ ކުންފުނީގެ ކުރީގެ އިސްވެރިންނަށް ވަރަށް ލުއި އަގުތަކެއްގައި ރިޒާވްކޮށްފައިވާކަން ހާމަވެއްޖެ އެވެ.

ހައްޖު ކޯޕަރޭޝަނުން 2024 ވަނަ އަހަރުގެ ކުރީކޮޅު އިއުލާންކުރި މި މަޝްރޫއަކީ ހުޅުމާލޭ ދެވަނަ ފިޔަވަހީގެ ޕްލޮޓް ނަންބަރު 22313 ގައި އަޅާ 15 ފަންގިފިލާގެ އިމާރާތެކެވެ. ފަހި ދިރިއުޅުން ކޯޕަރޭޝަން (އެފްޑީސީ) އާ ޑިޒައިންކުރުން ހަވާލުކޮށްފައިވާ މި އިމާރާތުގެ އެޕާޓްމަންޓްތައް އާންމުކޮށް ހުޅުވާލައިގެން ވިއްކާނެ ކަމަށް އެ ކުންފުނީގެ ކުރީގެ މެނޭޖިން ޑިރެކްޓަރު މުހައްމަދު ޝަކީލާ ހަވާލާދީ ކުރިން ބުނެފައިވީ ނަމަވެސް، ކަން ހިނގާފައިވަނީ އެހެން ނޫންކަން މިހާރު ވަނީ އެނގިފަ އެވެ.

އިތުބާރު ހުރި މަސްދަރުތަކުން މައުލޫމާތު ލިބޭ ގޮތުގައި، މި އިމާރާތުން އެޕާޓްމަންޓް ވިއްކުމަށް ހެދި އުސޫލުގެ ދަށުން ފުރުސަތު ދީފައިވަނީ ހަމައެކަނި ކުންފުނީގެ ދާއިމީ މުވައްޒަފުންނަށާއި، ބޯޑު މެންބަރުންގެ އިތުރުން ކަނޑައަޅާފައިވާ ހާއްސަ ކޮންޓްރެކްޓް މުވައްޒަފުންނަށެވެ. އަދި އާންމުކޮށް ރިއަލް އެސްޓޭޓް މަޝްރޫއުތަކުގައި ޕެންޓްހައުސްތައް އެހެން ޔުނިޓުތަކަށް ވުރެ އެތައް ގުނައެއް އަގުބޮޑުކޮށް ވިއްކާއިރު، މި މަޝްރޫއުގެ ޕެންޓްހައުސްތަކުގެ އަގު ކަނޑައަޅާފައިވަނީ އާދައިގެ ޔުނިޓުތަކާ މާ ބޮޑު ފަރަގެއް ނެތި، ވަރަށް ކުޑަ އަގެއްގަ އެވެ.

މި ޕެންޓްހައުސްތައް ނެގުމަށް ބުކިން ފީއެއްގެ ގޮތުގައި ދައްކަން ޖެހެނީ 50،000 ރުފިޔާ އެވެ. އަދި އިމާރާތް ނިމެންދެން، ދެ އަހަރުގެ މުއްދަތަށް މަހަކު ދައްކަން ޖެހެނީ އެންމެ 2،500 ރުފިޔާ އެވެ. އެންމެ މަތީ ފަންގިފިލާގެ ހަތަރު ޔުނިޓެއް މުވައްޒަފުންނަށް ރިޒާވްކޮށްފައިވާ ކޮށްފައިވާއިރު، އޭގެ ތެރޭގައި ކުރީގެ އިސްވެރިން ވެސް ހިމެނެ އެވެ.

ޕެންޓްހައުސް ރިޒާވްކުރި ބޭފުޅުންގެ ތެރޭގައި ހައްޖު ކޯޕަރޭޝަންގެ ކުރީގެ އެމްޑީ އަދި މިހާރުގެ އިލެކްޝަންސް ކޮމިޝަންގެ ރައީސް މުހައްމަދު ޝަކީލާއި، އެ ކުންފުނީގެ މިހާރުގެ ޑީއެމްޑީ މުހައްމަދު ޝިހާބުގެ އިތުރުން ކުރީގެ ސީއޯއޯ ނަޖީލް އަހްމަދު ހިމެނެ އެވެ. މި ބޭފުޅުންނަކީ 'ޝައިން ބްރައިޓް' ނަމަކަށް ކިޔާ އަމިއްލަ ވިޔަފާރިއެއްގައި ވެސް ހިއްސާވާ ބޭފުޅުންނެވެ.