އެމެރިކާގެ މަޝްހޫރު ރެޕް އަދި ހިޕްހޮޕް އާޓިސްޓް މެކްލެމޯ ޔޫރަޕްގައި ބޭއްވުމަށް ހަމަޖައްސާފައިވާ "ފްރީ ފަލަސްތީން" ކޮންސެޓް ޓުއާގެ ޓިކެޓުތައް ވިއްކަން ފެށިތާ ކުޑަ ވަގުތު ކޮޅެއްގެ ތެރޭގައި އެއްކޮށް ވިކި ހުސްވެއްޖެ އެވެ.

މި ޓުއާގެ ޓިކެޓުތައް އެއްކޮށް ވިކި ހުސްވުމާ ގުޅިގެން އުމުރުން 43 އަހަރުގެ ރެޕާ މެކްލެމޯ (އަސްލު ނަން: ބެންޖަމިން ހެގަޓީ) ވަނީ އޭނާގެ އިންސްޓަގްރާމް އެކައުންޓް މެދުވެރިކޮށް ސަޕޯޓަރުންނަށް ޝުކުރު އަދާކޮށްފަ އެވެ.

އެއާއެކު ޓިކެޓުތައް މިހާ އަވަހަށް ވިކި ހުސްވުމުން އޭނާ ހުރީ "ހައިރާންވެ އަންތަރީސް ވެފައި" ކަމަށްވެސް އޭނާ ފާހަގަކުރި އެވެ.

ޔޫރަޕްގެ ތިން ގައުމެއްގައި ބޭއްވުމަށް ހަމަޖެހިފައިވާ މި ޓުއާގެ ކޮންސަޓްތައް އޮންނާނީ އޮކްޓޯބަރު މަހުގެ ފަހުކޮޅުގަ އެވެ. އެއީ:

  • އޮކްޓޯބަރު 26: ޑުބްލިން، އަޔަލަންޑް
  • އޮކްޓޯބަރު 29: ޕެރިސް، ފްރާންސް
  • އޮކްޓޯބަރު 30: ލަންޑަން، އިނގިރޭސިވިލާތް

މި ކޮންސަޓްތަކުން ލިބޭ މުޅި ޖުމްލަ އާމްދަނީ ހަދިޔާ ކުރުމަށް ހަމަޖެހިފައިވަނީ ފަލަސްތީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދޭ ޖަމިއްޔާތަކަށެވެ.

މެކްލަމޯ މިފަދަ ޓުއާއެއް ކުއްލިއަކަށް ރޭވީ، ގައްޒާގައި ހިނގަމުންދާ ގަތުލުއާންމާ ދެކޮޅަށް އަދި ފަލަސްތީނުގެ ހައްގުގައި ފާޅުގައި ވަކާލާތު ކުރުމާ ގުޅިގެން، އެޑް ޝީރަންގެ "ލޫޕް" ޓުއާގެ ސަޕޯޓިން އާޓިސްޓުންގެ ލިސްޓުން އޭނާ އުނި ކުރުމާ ގުޅިގެންނެވެ.

މެކްލަމޯ ބުނެފައިވަނީ، ބާރުގަދަ ފަރާތްތަކުން ފަލަސްތީނުގެ މިނިވަންކަމަށް އެދި އުފުލާ އަޑުތައް ހިމޭން ކުރަން މަސައްކަތްކުރި ކަމުގައިވީ ނަމަވެސް، ފަންނުވެރިކަމަކީ އަބަދުވެސް ނުފޫޒުތަކާ ދެކޮޅަށް ކުރެވޭ ވަރުގަދަ އިހުތިޖާޖެއް ކަމަށެވެ.

އެއާއެކު އިންސާނީ ގަތުލު އާއްމެއް ހިނގަމުން ދާއިރު ސިޔާސީ ކަންކަމާ ދުރުގައި ހިމޭނުން ހުރުމަކީ މިހާރު ކުރެވޭނެ ކަމެއް ނޫން ކަމަށްވެސް އޭނާ ބުންޏެވެ.

"މެކްލެމޯ އެންޑް ފްރެންޑްސް"ގެ ނަމުގައި ބާއްވާ މި ކޮންސަޓްތަކުގައި އޭނާއާއެކު ބައިވެރިވާނެ އެހެން ފަންނާނުންގެ މައުލޫމާތު ކުރިއަށް އޮތް ދުވަސްތަކުގައި އިއުލާން ކުރާނެ ކަމަށް އޭނާ ވަނީ ބުނެފަ އެވެ.