އެމްޑީޕީގެ ރައީސާއި ނައިބު ރައީސްގެ މަގާމު އުވާލައި، އެ ޕާޓީގެ އެންމެ އިސް މަގާމުގެ ގޮތުގައި ޗެއާޕާސަންގެ މަގާމު ހަމަޖެއްސުމަށް އަސާސީ ގަވާއިދަށް ހުށަހެޅި އިސްލާހުތައް އެމްޑީޕީގެ ކޮންގްރެސްއިން ފާސްކޮށްފި އެވެ.

މާލޭ ސިޓީ ކައުންސިލުގެ ހޯލުގައި ކުރިއަށްދިޔަ އެމްޑީޕީގެ ކޮންގްރެސްއަށް މި އިސްލާހުތައް ހުށަހެޅުއްވީ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ. ފައްޔާޒް ހުށަހެޅުއްވި އިސްލާހުތައް ކޮންގްރެސްއިން ފާސްކޮށްފައިވަނީ 546 ވޯޓުންނެވެ.

މި އިސްލާހުތަކުގެ ދަށުން ލީޑާޝިޕަށް ބޮޑެތި ބަދަލުތަކެއް ވަނީ ގެނެސްފަ އެވެ. އެގޮތުން ޕާޓީގެ ރައީސާއި ނައިބު ރައީސްގެ މަގާމު އުވާލުމުގެ އިތުރުން، ޗެއާޕާސަންގެ މަގާމުގައި ހުންނަވާ ބޭފުޅަކަށް އެހެން އެއްވެސް މަގާމެއް އަދާނުކުރެވޭ ގޮތަށް ވަނީ ހަމަޖައްސައިފަ އެވެ. އަދި ޗެއާޕާސަންގެ ނައިބު (އިދާރީ) އާއި ޗެއާޕާސަންގެ ނައިބު (މާލީ) ގެ އިތުރުން ޗެއާޕާސަންގެ ނައިބު (ސިޔާސީ) ގެ މަގާމު ވަނީ އުފައްދައިފަ އެވެ.

އަސާސީ ގަވާއިދަށް ގެނެވުނު ބަދަލުތަކުގެ ތެރޭގައި ޕާޓީގެ ރިޔާސީ ކެންޑިޑޭޓު ތަބާވާންޖެހޭ ހާއްސަ އުސޫލުތަކެއް ވަނީ ކަނޑައަޅައިފަ އެވެ. އެގޮތުން ރިޔާސީ ޕްރައިމަރީ ކާމިޔާބުކުރާ ފަރާތުން ސަރުކާރު އެކުލަވާލުމާއި މުހިންމު ސިޔާސަތުތައް ތަންފީޒުކުރުމުގައި ގައުމީ މަޖިލީހުގެ ލަފާ ހޯދުމަށް އެއްބަސްވުމެއްގައި ސޮއިކުރުން ލާޒިމުވެ އެވެ. އަދި ވެރިކަމުގައި އޮންނައިރު ސަރުކާރުގެ މައިގަނޑު ސިޔާސަތުތައް އެކުލަވާލުމުގައި ޕާޓީއާއެކު މަޝްވަރާކުރުމާއި، ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރަންޖެހޭ ގޮތަށްވެސް ވަނީ ކަނޑައަޅައިފަ އެވެ.

މީގެއިތުރުން ޕާޓީގެ އިންތިހާބުތަކުގައި ވޯޓުދިނުމާއި ވާދަކުރުމުގެ އުސޫލުތަކަށްވެސް ބަދަލުތަކެއް ވަނީ ގެނެސްފަ އެވެ. އެގޮތުން އިންތިހާބުގައި ވޯޓުލެވޭނީ ވޯޓުލާ ދުވަހުގެ ތިން މަސް ދުވަސް ކުރިން ޕާޓީގެ ދަފްތަރުގައި ރަޖިސްޓަރީވެފައިވާ މެންބަރުންނަށް ކަމަށް ވަނީ ކަނޑައަޅައިފަ އެވެ. މި އިސްލާހު ކޮންގްރެސްއަށް ހުށަހެޅުއްވީ ޕާލިމަންޓަރީ ގްރޫޕުގެ ލީޑަރު އިބްރާހިމް ނާޒިލެވެ.

ކޮންގްރެސްގައި ކުޑަހުވަދޫ ދާއިރާގެ ރައީސް ޝާތިރު އަބްދުއްރަހުމާން ހުށަހެޅުއްވި ބައެއް އިސްލާހުތައްވެސް ވަނީ ފާސްކޮށްފަ އެވެ. އޭގެ ތެރޭގައި ކޮންގްރެސްގައި ބައިވެރިވާ މެންބަރުންގެ ނަންތައް 10 ދުވަސް ކުރިން އިއުލާންކުރުމާއި، އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތް ކަމުގެ މައްސަލަތަކުގައި ވޯޓުނުލެވޭ ގޮތް ހެދުން ހިމެނެ އެވެ.