ކުދިންގެ ހަށިގަނޑު ރަނގަޅަށް ބޮޑުވެ، ތަރައްގީ ވުމަށް އެންމެ މުހިންމު އެއް މާއްދާއަކީ ޕްރޮޓީން އެވެ. ނަމަވެސް ބައެއް ފަހަރު ކުދިންގެ ކެއުމުގެ އާދަތައް ހުންނަ ގޮތުން ނުވަތަ ކާ އެއްޗެހީގެ ބާވަތްތައް މަދުވުމުގެ ސަބަބުން ހަށިގަނޑަށް ބޭނުންވާ ވަރަށް ޕްރޮޓީން ނުލިބި ހިނގައިދާނެ އެވެ.

ސިއްހީ މާހިރުން ފާހަގަކުރާ ގޮތުގައި، ކުއްޖާއަށް ޕްރޮޓީން މަދުވާކަން އަންގައިދޭ މައިގަނޑު 5 ނިޝާނެއް އެ ކުދިންގެ ފަރާތުން ފެންނާނެ އެވެ.

ހަށިގަނޑު އެދެވޭ ގޮތަށް ބޮޑު ނުވުން

ކުއްޖާގެ އުމުރާ އެކަށީގެންވާ ވަރަށް ހަށިގަނޑު ބޮޑު ވަމުން ނުދިޔުމަކީ ނުވަތަ އިސްކޮޅާއި ބަރުދަން އިތުރުވުން ލަސްވުމަކީ ހަށިގަނޑަށް ޕްރޮޓީން މަދުވުމުގެ އެންމެ ބޮޑު އެއް ނިޝާނެވެ. ހަށިގަނޑުގެ ސެލްތަކާއި މަސްތައް އުފެދުމަށް ޕްރޮޓީން ކޮންމެހެން ބޭނުންވެ އެވެ.

އަބަދުވެސް ވަރުބަލި ވެފައި ހުރުމާއި ހަކަތަ މަދުވުން

ކުޅިވަރު ކުޅޭއިރު ނުވަތަ ކިޔެވުމުގައި އުޅޭއިރު އަބަދުވެސް ވަރުބަލިވެ، ހަކަތަ ނެތް ކަހަލަ ގޮތަކަށް ދަރިފުޅު ފެންނަނަމަ، އެއީ ހަށިގަނޑަށް ބޭނުންވާ ކާނާގެ މާއްދާތައް، ހާއްސަކޮށް ޕްރޮޓީން މަދުވުމުގެ ސަބަބުން ވާ ކަމަކަށް ވެދާނެ އެވެ.

ބަނޑުހައިވުމުގެ އާދަތަކަށް ބަދަލު އައުން

ހަށިގަނޑަށް ޕްރޮޓީން ނުލިބޭ ނަމަ، އަބަދުވެސް ކޮންމެވެސް އެއްޗެއް (ހާއްސަކޮށް ހަކުރާއި ތެޔޮ އެކުލެވޭ ކާނާ) ކާން ބޭނުންވުމުގެ އާދަ އަށަގަނެ އެވެ. ޕްރޮޓީންއަކީ ބަނޑުހައިކަން ދުރުކޮށްދީ ގިނައިރު ވަންދެން ހަށިގަނޑަށް ބާރު ގެނެސްދޭ މާއްދާ އެކެވެ.

ކަންކަމަށް ދޭ ސަމާލުކަން ކުޑަވުމާއި ހަނދާން ބަލިވުން

ޕްރޮޓީންއަކީ ސިކުނޑީގެ މަސައްކަތްތަކަށް ވެސް ވަރަށް މުހިންމު މާއްދާއެކެވެ. ކުއްޖާ ކަންކަމަށް ސަމާލުކަންދޭ މިންވަރު ދަށްވުމާއި، ސްކޫލުގެ ކަންކަމުގައި ނުވަތަ ކަންކަން ދަސްކުރުމުގައި އުނދަގޫތަކެއް ކުރިމަތިވާނަމަ، ކެއުމުގެ އާދަތަކަށް ވިސްނާލަން ޖެހެ އެވެ.

ނިޔަފަތި، އިސްތަށިގަނޑު އަދި ހަންގަނޑު ހަލާކުވުން

އިސްތަށިގަނޑު ނުވަތަ ނިޔަފަތި ފަސޭހައިން ބިންދައިގެން ދިޔުމާއި، ހަންގަނޑު ހިކި ނުވަތަ ތާޒާކަން ގެއްލިފައި ހުރުމަކީ ޕްރޮޓީން މަދުވުމުގެ ސަބަބުން ދިމާވާ ކަންކަމެވެ.

ހައްލަކީ ކޮބާ؟

މިފަދަ ކަންކަމުން ރައްކާތެރި ވުމަށްޓަކައި، ކުއްޖާގެ ކެއުމުގައި ކިރު، ބިސް، މަސް، ކުކުޅު، ބީންސް އަދި އެކި ބާވަތްތަކުގެ ބަދަން ފަދަ ޕްރޮޓީން މުއްސަނދި ކާނާ ގަވާއިދުން ހިމެނުމަށް މައިންބަފައިން ސަމާލުކަން ދޭން ޖެހެ އެވެ.