ހަށިގަނޑުގެ ހުޅުތަކުގައި ރިއްސުމަކީ ގިނަ ބަޔަކު ތަހައްމަލް ކުރަމުންދާ މައްސަލައެކެވެ. ދިވެހިންގެ ތެރޭގައި އާއްމު މި މައްސަލައަށް ގޭގައި ތިބެގެން ކުރެވިދާނެ ފަސޭހަ ފަރުވާތަކެއް ހުރެ އެވެ.

ބަރުދަން ލުއިކުރުން

ބަރުދަން އިތުރުވުމަކީ ހުޅުތަކަށް އޭގެ ނޭދެވޭ އަސަރު ކުރާނެ ކަމެކެވެ. ބަރުދަން އިތުރުވާ ވަރަކަށް ހުޅުތަކަށް ކުރާ ބާރު ބޮޑުވެ އެވެ. ޚާއްސަކޮށް އުނަގަނޑާއި ކަކުލާއި ތަނބިކަށި އެއީ ބަރުދަން އިތުރުވުމުގެ ސަބަބުން ބާރު ބޮޑުވާނެ ހިސާބުތަކެވެ. އެހެންކަމުން ބަރުދަން ލުއިކުރުމަކީ ހުޅުތަކުގައި ރިއްސުމަށް އެޅޭނެ އެންމެ ބޮޑު އެއްފަރުވާ އެވެ.

ކަސްރަތު ކުރުން

ހުޅުތަކުގައި ރިއްސާނަމަ ގަވާއިދުން ކަސްރަތުކުރުމަކީ ފަސޭހަވާނެ ކަމެކެވެ. އެގޮތުން ހިނގުމާއި ބައިސްކަލް ދުއްވުން އަދި ފެތުން ފަދަ ހެލިފެލިވެ އުޅެވޭ ހަރަކާތްތަކުގެ ސަބަބުން ހުޅުތަކުގެ ސިއްހަތު ރަނގަޅުވެ، ރިހުން ކުޑަވެ އެވެ.

ރަނގަޅު ކާނާ ކެއުން

ސިއްހަތަށް ރަނގަޅު ކާނާ ކެއުމަކީ އޭގެ ޒާތުގައި ހުޅުތަކަށް ރަނގަޅު އަސަރުކުރާނެ ކަމެކެވެ. މޭވާ އާއި ތަރުކާރީ ހިމެނޭ ގޮތަށް ބައްޓަންކުރުމަކީ ހުޅުތަކަށް އެންމެ ފައިދާ ބޮޑުގޮތެވެ. ހަމަ އެއާއެކު ކެލްސިއަމް ގިނަ ކާނާގެ ބާވަތްތައް ވެސް ކެއުމުގައި ހިމެނުން މުހިންމެވެ. އޭގެ ތެރޭގައި ކިރުގެ ބާވަތްތައް ފާހަގަކޮށްލެވެ އެވެ.