މިއަހަރު ބާއްވާ މިސް ވޯލްޑް މުބާރާތުގެ 71 ވަނަ އެޑިޝަން އިންޑިއާގައި ބޭއްވުމަށް ނިންމައިފި އެވެ.

މިއީ މިސް ވޯލްޑް މުބާރާތް އިންޑިއާގައި ބާއްވާ ދެ ވަނަ ފަހަރު އެވެ. އެންމެ ފުރަތަމަ މިސް ވޯލްޑް މުބާރާތް އިންޑިއާގައި ބާއްވާފައިވަނީ 1996 ވަނަ އަހަރު އެވެ.

ނިއުދިއްލީގައި ބޭއްވި ނޫސްވެރިންގެ ބައްދަލުވުމެއްގައި މިސް ވޯލްޑް އޮގަނައިޒޭޝަން އިންޑިއާގައި މިފަހަރުގެ މިސް ވޯލްޑް ބާއްވާކަން ވަނީ އިއުލާނުކޮށްފަ އެވެ. މިނޫސްވެރިންގެ ބައްދަލުވުމުގައި މިސް ވޯލްޑްގެ ޗެއާޕާސަން އަދި ސީއީއޯ ކެރޮލީނާ ބިއެލަވްސްކާގެ ހާޒިރުގަ ވަނީ ބައިވެރިވެފަ އެވެ.

އެ ޖަމިއްޔާއިން ހިއްސާކުރި ބަޔާނެއްގައި ބުނެފައިވަނީ އިންޑިއާގައި މިފަހަރުގެ މިސް ވޯލްޑް ބޭއްވުމަށް ނިންމީ އެގައުމަކީ މުއްސަނދި ސަގާފަތެއް އޮތް ގައުމަކަން ވާތީ ކަމަށެވެ. އަދި އަންހެނުން ބާރުވެރި ކުރުމަށް ގިނަ މަސައްކަތްތަކެއް ކުރަމުން އަންނާތީ ކަމަށްވެސް ވަނީ ބުނެފަ އެވެ.

އިންޑިއާގައި ބާއްވާ 71 ވަނަ މިސް ވޯލްޑް 2023 ގައި ހިންގޭ ހަރަކާތްތަކުގެ ތެރެއިން ދަރުމަވެރި މަސައްކަތްތައް ޕްރޮމޯޓްކޮށް، މުބާރާތުގައި ބައިވެރިވާ ފަރާތްތަކަށް އެމީހުންގެ މުޖުތަމައުތަކަށް އެމީހުންގެ ފަރާތުން ފައްސި އަސަރުތަކެއް ކޮށް މުޖުތަމައަށް އެކަންތައް ހިއްސާ ކުރުމަށް ބާރުއަޅުވާނެ އެވެ.

މިއަހަރުގެ މިސް ވޯލްޑް އިންޑިއާގައި ބޭއްވުމަށް ނިންމާފައިވާއިރު އިންޑިއާގެ ބައެއް ތަރިން ވަނީ މިމުބާރާތް ކާމިޔާބުކޮށްފަ އެވެ. އެގޮތުން ރެއިތާ ފާރިއާ، ޑަޔާނާ ހައިޑްން، ޔުކްތާ މޫކްތީ، އައިޝްވަރްޔާ ރާއި ބައްޗަން، ޕްރިޔަންކާ ޗޯޕްރާ އަދި މަނޫޝީ ޗިލާ ހިމެނެ އެވެ.