1980ގެ އަހަރުތަކުގައި ބޮލީވުޑުން ވިދާލި ތަރިއެއް ކަމަށްވާ ޖާޔާ ޕްރާޑާ، ޖިނާއީ މައްސަލައެއްގައި ހަ މަހަށް ޖަލަށް ލާން އިންޑިއާގެ ކޯޓަކުން ހުކުމް ކޮށްފި އެވެ.

ހަބަރުތައް ބުނާ ގޮތުގައި ޖާޔާ ޖަލަށް ލާން ހުކުމް ކޮށްފައިވަނީ 1990ގެ އަހަރުތަކުގައި އޭނާ ހިންގި ޑްރާމާ ތިއޭޓަރެއްގައި މަސައްކަތްކުރި މުވައްޒަފުންނަށް ދޭންޖެހޭ މުސާރަ ނުދީގެންނެވެ.

ބަނގުރޫޓު ވުމަށްފަހު އެ ތިއޭޓަރު ބަންދު ކުރިއިރު މުވައްޒަފުންނަށް މުސާރަ ނުދިނުމުން އެތަނުގައި ވަޒީފާ އަދާކުރި ބައެއް މީހުން ވަނީ ޖާޔާއާއި އޭނާގެ ބައިވެރިންނާ ދެކޮޅަށް ކޯޓަށް މައްސަލަ ހުށައަޅާފަ އެވެ.

މި މައްސަލާގައި ޖާޔާގެ ބައިވެރިންނަށް ވެސް ޖަލު ހުކުމެއް އައިސްފައިވާއިރު ޖަލު ހުކުމްގެ އިތުރުން 5000 ރުޕީސްގެ ޖޫރިމަނާއެއް ވެސް އޭނާއަށް ލިބިފައިވެ އެވެ.

މައްސަލަ ކޯޓުން ބޭރުން ހައްލު ކުރަން ޖާޔާ ފަހުން އެދިފައިވީ ނަމަވެސް މައްސަލަ ބެލި ޗެންނާއީގެ ކޯޓުން ވަނީ އެކަމަށް ދެކޮޅު ހަދާފަ އެވެ.

ޖާޔާއަކީ ބޮލީވުޑްގެ އިތުރުން ތަމަޅަ އަދި ތެލުގޫ ފިލްމުތަކުގައި ވެސް ހަރަކާތްތެރިވި ފަންނާނެކެވެ.