އެކްޓްރެސް އަނަންޔާއާއެކު އޮތް ލޯބީގެ ގުޅުން ނިންމާލުމަށްފަހު ބޮލީވުޑްގެ ޒުވާން ތަރި އިޝާން ޚައްތަރު މިހާރު ރައްޓެހިވެގެން އުޅެނީ މެލޭޝިއާގެ މޮޑެލްއަކާ ކަމަށް ހަބަރުތައް ބުނެފި އެވެ.

އެގޮތުން އިޝާންގެ އާ ލޯބިވެރިޔާއަކީ މެލޭޝިއާއަށް އުފަން އިންޑިއާ ނަސްލުގެ މޮޑެލްއެއް ކަމަށްވާ ޗާންދްނީ ބައިންޒަ ކަމަށް ރިޕޯޓުތައް ބުނެ އެވެ.

އެދެމީހުން އެކުގައި އެކި ތަންތަނުން ފެނިފައިވާއިރު އިޝާންގެ ގާތް މީހުންނަށް ޗާންދްނީ ތައާރަފް ވެސް ކޮށްދީފައިވާ ކަމަށް މީޑިއާތަކުން އަންނަނީ ބުނަމުންނެވެ.

މި ހަަބަރުތައް އައިސްފައި މިވަނީ އަނަންޔާއާއި އިޝާންގެ ގުޅުން ނިމުނުކަން މީޑިއާއަށް ފަޅާ އެރިތާ މަދު ދުވަސްކޮޅެއްގެ ތެރޭގަ އެވެ.

ގާތްގަނޑަކަށް އަހަރެއްހާ ދުވަހު ރައްޓެހިވެގެން އެކުގައި އުޅުމަށްފަހު އިޝާންއާއި އަނަންޔާ ވަކިވީ އަނަންޔާގެ ފިލްމީ މަސައްކަތްތަކާ ހެދި ކަމަށް ބުނެވެ އެވެ.

އިޝާންއާ ވަކިވުމަށްފަހު އަނަންޔާ މިހާރު އުޅެނީ އާޝިގީ 2 އިން މަޝްހޫރުވި އަދިތުޔާ ރޯއީ ކަޕޫރުއާ ރައްޓެހިވެގެން ކަމަށް ވެސް ހަބަރުތައް ބުނެ އެވެ.