ނެޝަނަލް އެވޯޑަކީ އިންޑިއާގެ މުނިފޫހި ފިލުވުމުގެ ދާއިރާގައި އެގައުމުގެ ސަރުކާރުގެ ފަރާތުންދެވޭ އެންމެ ޝަރަފުވެރި އެއް އެވޯޑެވެ. އެގޮތުން މިއަހަރުގެ ނެޝަނަލް އެވޯޑް ވެސް ވަނީ ވަރަށް ފަހުން ބާއްވާފަ އެވެ.

މި އެވޯޑާ ބެހޭ ގޮތުން ވާހަކަ ދައްކަމުން 90ގެ އަހަރުތަކުގައި މަޝްހޫރުވި ލަވަކިޔުންތެރިޔާ ކުމާރް ސާނޫ ބުނީ އޭނާއަށް ދުވަހަކު ވެސް ނެޝަނަލް އެވޯޑެއް ނުލިބޭ ކަމަށެވެ.

އެކަމާ ދެރަވާ ކަމަށް ބުނަމުން ސާނޫ އިތުރަށް ބުނެފައިވަނީ އެފަދަ އެވޯޑުތައް ހޯދުމަށްޓަކައި ނުފޫޒު އޮންނަން ޖެހޭ ކަމަށާއި މީހުން ރުއްސަން ވެސް އެނގެންޖެހޭ ކަމަށެވެ.

ދިގު ކެރިއަރުގައި ނެޝަނަލް އެވޯޑެއް ލިބިފައިނުވާތީ ކުޑަކޮށް ދެރަވި ނަމަވެސް އެކަމާ މާ ބޮޑަށް އަޅާނުލާ ކަމަށް ވެސް ސާނޫ ބުުންޏެވެ.

ނެޝަނަލް އެވޯޑެއް ލިބިފައިނުވި ނަމަވެސް ސާނޫއަށް ވަނީ އެކިފަހަރު މަތިން އެހެން އެވޯޑުތައް ލިބިފަ އެވެ. އޭގެ ތެރޭގައި ފިލްމްފެއާ އެވޯޑްސްފަދަ އެވޯޑްތައް ފާހަގަ ކުރެވެ އެވެ.

މިއަހަރު އިންޑިއާގެ ނެޝަނަލް އެވޯޑުން އެންމެ ވިދާލި ތަރިންނަކީ "ގަންގޫބާއީ ކަތިއާވަޑާ"ގެ އާލިއާ ބަޓްއާއި "މިމީ"ގެ ކްރިތީ ސެނަން އެވެ.