ރިޔާސީ އިންތިހާބުގެ ދެވަނަ ބުރު ކާމިޔާބުކޮށް ވެރިކަން ލިބިއްޖެނަމަ ވިނަރެސް ފްލެޓްތަކުގެ އަގު ކުޑަކޮށްދެއްވާނެ ކަމަށް ޕީޕީއެމް، ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.

މާވެޔޮމަގުގައި މިރޭ ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ އެއީ އޭނާގެ ހައުސިން މިނިސްޓަރު ކަމުގައި ސޮއިކުރި މަޝްރޫއެއް ކަމަށެވެ. ނަމަވެސް މި ސަރުކާރުން ވަނީ އެ މަޝްރޫއުގެ ނަން ބަދަލުކޮށްފައި ކަމަށް މުއިއްޒު ވިދާޅުވި އެވެ.

މުއިއްޒު ވިދާޅުވީ ދެ ލައްކަ ރުފިޔާގެ ޑައުންޕޭމަންޓަކާއި އަދި މަހުން މަހަށް ފައިސާ ދައްކަންޖެހޭ ގޮތަށް ވިނަރެސް ފްލެޓްތައް ދޫކުރަން މި ސަރުކާރުން މަސައްކަތް ކުރަނީ ކުރީގެ ސަރުކާރުގައި މަޝްރޫއު ރޭވި ގޮތާ ހިލާފަށް ކަމަށެވެ. އެހެންކަމުން އޭނާ ދޭ ޔަގީންކަމަކީ ޑައުންޕޭމަންޓާއި މަހުން މަހަށް ދައްކަންޖެހޭ ފައިސާގެ އަދަދު ކުޑަކޮށްދެއްވާނެ ކަން ކަމަށް މުއިއްޒު ވިދާޅުވި އެވެ.

ހިޔާ މަޝްރޫއުގެ ތެރެއިން ސަރުކާރު ކުންފުނިތަކުން އަޅާފައިވާ ފްލެޓްތަކުގެ އަގުތައް ވެސް ހެޔޮ ކުރައްވާނެ އޭނާ ވަނީ ވައުދުވެވަޑައިގެންފަ އެވެ.

މުއިއްޒު ވިދާޅުވީ މާލެއިން ދޫކުރި ގޯތިތަކުގައި ގެދޮރު އެޅޭނެ ގޮތް ހަދައިދީ އަދި ފްލެޓްތައް ވެސް އަޅައިދޭނެ ކަމަށެވެ.

މުއިއްޒު މީގެކުރިން ވަނީ މި ސަރުކާރުން އަތުލި ހިޔާ ފްލެޓްތައް އޭގެ ހައްގުވެރިންނަށް ހޯއްދަވައިދެއްވާނެ ކަމަށް ވިދާޅުވެފަ އެވެ.