ސަނީ ޑިއޯލްއަކީ އޭނާގެ ފިލްމީ ހަޔާތުގެ އިތުރުން ޒާތީ ދިރިއުޅުމަށްޓަކައި ވެސް ގިނަ ބައެއްގެ ސަމާލުކަން ހޯދާފައިވާ އެކްޓަރެކެވެ. އޭނާ ފާހަގަ ކުރެވެނީ އޭނާގެ އާއިލާއާ ވަރަށް ގާތް ގުޅުމެއް ބާއްވާ އެކްޓަރެއްގެ ގޮތުގަ އެވެ.

އާއްމުކޮށް މަޑުމައިތިރި މިޒާޖެއްގެ ސަނީއަކީ ހަގީގަތުގައި ވަރަށް ރުޅިގަދަ މީހެއް ކަމަށްވެސް ބުނެވެ އެވެ. އެގޮތުން އޭނާ ވަނީ އެކްޓްރެސް ހެމާ މާލިނީ އޭނާގެ ބައްޕަ ދަރުމެންދްރައާ ކައިވެނި ކުރުމުން ހެމާއަށް ހަމަލާ ދީފަ އެވެ.

ހަބަރުތައް ބުނާގޮތުގައި ހެމާއާއި ދަރްމެންދްރާ ކައިވެނި ކުރުން އެއީ ސަނީއަށް އެހާ ފަސޭހައިން ބަލައިގަނެވުނު ކަމެއް ނޫނެވެ. އޭނާ ދެކުނީ ހެމާއަކީ އޭނާގެ އާއިލާ ހަލާކު ކޮށްލި "ދެވަނަ އަންހެނެއްގެ" ގޮތުގަ އެވެ.

ނަތީޖާއަކަށްވީ ކައިވެންޏަށްފަހު ހެމާ ދަރުމެންދްރާގެ ގެއަށް އައުމުން އެކި ކަންކަމުގައި އޭނާއާއި ދަރްމެންދްރާގެ އާއިލާއާ ދެމެދު ހަމަނުޖެހުންތައް އުފެދުމެވެ. އެފަދަ ހަމަނުޖެހުމެއްގެ ތެރެއިން ސަނީ ވަނީ ހެމާއަށް ވަޅިން ހަމަލާ ވެސް ދީފަ އެވެ.

އެހެން ނަމަވެސް ސަނީގެ މަންމަ ޕްރަކާޝް ކައުރް ވަނީ ފުރަތަމަ ފަހަރަށް މީޑިއާއަށް ނުކުމެ ފާޅުގައި އޭނާގެ ދަރިފުޅު ދިފާއުކޮށް އެއީ ދޮގު ވާހަކަތަކެއް ކަމަށް ބުނެފަ އެވެ.

ދަރްމެންދްރާގެ ފުރަތަމަ ކައިވެންޏަށް ދެ ދަރިން ލިބިފައިވެ އެވެ. އެއީ ސަނީއާއި އޭނާގެ ކޮއްކޮ ބޮބީ އެވެ. އެއަށްފަހު ހެމާއާއެކު އޭނާ ކުރި ކައިވެންޏަށް އީޝާ ޑިއޯލްއާއި އަހާނާ ޑިއޯލް ލިބިފައިވެ އެވެ.