ބޮލީވުޑްގެ ކުރީގެ އެކްޓްރެސް އަދި ކާމިޔާބު ލިޔުންތެރިޔާ ޓްވިންކަލް ޚަންނާ އޭނާގެ ހަތަރުވަނަ ފޮތް ނެރެން އުޅޭކަން އިއުލާން ކޮށްފި އެވެ.

"ވެލްކަމް ޓު ޕެރެޑައިޒް"ގެ ނަމުގައި ނެރޭ އެ ފޮތަކީ ގެވެށި ގުޅުންތަކާއި ބޭވަފާތެރިކަމާއި ހިތްދަތިކަމުގެ މައްޗަށް ލިޔެފައިވާ ޚިޔާލީ ވާހަކަތަކެއް އެކުލެވޭ ފޮތެއް ކަމަށް އޭނާ ބުނެފައިވެ އެވެ.

އިންސްޓަގުރާމްގައި އެ ފޮތާއެކު ނަގާފައިވާ ފޮޓޯއެއް ހިއްސާކުރަމުން ޓްވިންކަލް އިތުރަށް ބުނީ އެ ފޮތަކީ ގިނަ ދުވަސްތަކެއް ވަންދެން އޭނާ ގެންގުޅުނު ހިޔާލުތަކަށް ބިނާކޮށްފައިވާ ފޮތެއް ކަމަށެވެ.

ޓްވިންކަލް އޭނާގެ ހަތަރުވަނަ ފޮތް ނެރެން އުޅޭކަން އިއުލާން ކޮށްފައި މިވަނީ ލަންޑަންގެ ގޯލްޑް ސްމިތުން ވާހަކަ ލިޔުމުގެ ރޮނގުން އޭނާ މާސްޓާސް ޑިގްރީ ހާސިލްކުރިތާ މާ ގިނަ ދުވަސްތަކެއް ނުވަނީހެވެ.

މި ފޮތް އަންނަ ނޮވެމްބަރު މަހު އާއްމުކޮށް ނެރޭއިރު މިހާރުވެސް ގިނަ ޕްރީ އޯޑަރު ތަކެއް ލިބިފައިވާ ކަމަށް ހަބަރުތައް ބުނެ އެވެ. ޓްވިންކަލްއަކީ 2000ގެ އަހަރުތަކުގައި ބޮލީވުޑް ފިލްމުތަކުން ފެނުމަށްފަހު އެ ދާއިރާ ދޫކޮށް ވިޔަފާރީގެ ދުނިޔޭގައި ހަރަކާތްތެރިވާ ޝަހްސިއްޔަތެކެވެ.