ސްޓާ ޕްލަސް އިން ދައްކަމުން އަންނަ މަގުބޫލު ސީރީޒް "އަނޫޕަމާ"އަކީ ދިވެހިންނަށް ވެސް އާ ނަމަކަށް ނުވާނެ އެވެ. އެ ސީރީޒްގައި ލީޑު ރޯލް "އަނޫޕަމާ"ގެ ގޮތުގައި ފެންނަ ރުޕާލީ ގަންގޫލީއަކީ އިންޑިއާގައި ވެސް މަގުބޫލު ފަންނާނެކެވެ.

ރުޕާލީއަކީ ބޮލީވުޑް އާއިލާއަކަށް ނިސްބަތްވާ ފަންނާނެއް ނަމަވެސް އޭނާ ޚިޔާރުކުރީ ޓީވީ ސީރީޒްތަކެވެ. މިސަބަބަށްޓަކައި އާއިލާއާއި ރައްޓެހިންގެ ނުރުހުން ވެސް އޭނާއަށް އަމާޒުވި އެވެ.

ބޮލީވުޑް ދޫކޮށް ޓީވީ ޚިޔާރުކުރީ ކީއްވެގެންތޯ ކުރެވުނު ސުވާލަކަށް ރުޕާލީ ވަނީ ދާދި ފަހުން ޖަވާބު ދީފަ އެވެ. އިންޑިއާގެ މީޑިއާއަކަށް ދިން އިންޓަވިއުއެއްގައި އޭނާ ވަނީ ބޮލީވުޑްގެ އަނދިރި ފަރާތް ކިޔައިދީފަ އެވެ.

ރުޕާލީ ބުނީ ބޮލީވުޑްއަކީ ވަރަށް ވާދަވެރި ތަނެއް ކަމަށާއި ފިލްމުތަކަށް މީހުން ނެގުމުގައި ވަރަށް ބޮޑު ތަފާތު ކުރުންތައް ގެންގުޅޭ ކަމަށެވެ.

އެހެން ކަމުން ފިލްމީ ދުނިޔެއަށް ނުނުކުމެ ޓީވީ ސީރީޒްތައް ކުޅުމުގައި ދެމި ހުރުމަށް އޭނާ ނިންމީ ކަމަށް ރުޕާލީ ބުނެފައިވެ އެވެ. ރުޕާލީ އަންނަނީ ދެހާހުގެ އަހަރުތަކުން ފެށިގެން ޓީވީ ސީރީޒްތަކުގައި މަސައްކަތް ކުރަމުންނެވެ.

މިހާރު ރުޕާލީ ފެންނަ "އަނޫޕަމާ"އަކީ ވެސް ގިނަ ބައެއްގެ ތަރުހީބު ހޯދާފައިވާ މަޝްހޫރު ސީރީޒް އެކެވެ. އެއީ އަންހެނުން ބާރުވެރި ކުރަން މަސައްކުރާ ޝޯ އެކެވެ.