2008 ވަނަ އަހަރު ނުކުތް ފިލްމު "ގަޖްނީ"އިން ގިނަ ބައެއްގެ ސަމާލުކަން ހޯދި އެކްޓްރެސް އަސިން އެއް އަހަރުގެ މެދުކެނޑުމަކަށްފަހު އިންސްޓަގްރާމަށް އެނބުރި އައިސްފި އެވެ.

އެއް އަހަރުފަހުން އަސިން ކުރި ޕޯސްޓުގައި އޭނާ ހިއްސާކޮށްފައިވަނީ ދަރިފުޅު އަރިންގެ ހަވަނަ އުފަން ދުވަހުގެ ފޮޓޯ ތަކެވެ. ހަބަރުތައް ބުނާ ގޮތުގައި އަސިންއާއި އާއިލާ ދަނީ ދަރިފުޅުގެ އުފަންދުވަސް ފްރާންސްގައި ފާހަގަ ކުރަމުންނެވެ.

ބޮލީވުޑްގެ އެހެން އެކްޓަރުންނާ ޚިލާފަށް އަސިންއަކީ އިންސްޓަގުރާމްގައި އެހާ ހަރަކާތްތެރި އެކްޓަރެއް ނޫނެވެ. ކޮންމެ އަހަރަކު ވެސް އޭނާ އިންސްޓަގްރާމްގައި ހިއްސާ ކުރަނީ އެންމެ ޕޯސްޓެކެވެ. އެއީ އަރިންގެ އުފަން ދުވަހާ ގުޅުވައިގެންނެވެ.

2016 ވަނަ އަހަރު މައިކްރޯ މެކްސްގެ ކޯ ފައުންޑަރު ރާހުލް ޝަރްމާއާ ކައިވެނިކުރި އަސިން އޭނާގެ އަލަތު ދަރިފުޅަށް މަރުހަބާ ކިޔާފައިވަނީ 2017 ވަނަ އަހަރުގެ އޮކްޓޯބަރު މަހު އެވެ.

ކައިވެންޏަށްފަހު ބޮލީވުޑް ދޫކޮށްލަން ނިންމި އަސިންއަކީ އޭގެ ކުރިން ކާމިޔާބު ފިލްމުތަކަކުން ފެނިފައިވާ ތަރި އެކެވެ. އޭގެ ތެރޭގައި ގަޖްނީގެ އިތުރުން "ހައުސްފުލް 2" އަދި "އޯލް އިޒް ވެލް" ހިމެނެ އެވެ.