ރަންވީރު ސިންހްއާއި ދީޕިކާ ޕަދުކޯންއަކީ ހަމަ ގައިމުވެސް ބޮލީވުޑްގެ ޖޯޑުތަކުގެ ތެރެއިން އެންމެ ގިނަ ބައެއްގެ ލޯބި ހޯދާފައިވާ އެއް ޖޯޑު ކަމަށް ބުނުމަކުން ދޮގަކަށް ނުވާނެ އެވެ.

ދޭތެރެ ދޭތެރެއިން އެ ދެތަރިން އެކަކު އަނެކަކަށްޓަކައި ސޯޝަލް މީޑިއާގައި އާއްމުކުރާ ޕޯސްޓުތަކުން އެ ދެމީހުންގެ ލޯބި ވަރަށް ރަނގަޅަށް އެނގިގެންދެ އެވެ.

މިފަހަރު އެ ދެތަރިން މިވަނީ ޑައިރެކްޓަރު ކަރަން ޖޯހަރުގެ ޓޯކް ޝޯ "ކޮފީ ވިތު ކަރަން"ގައި އެކުގައި ބައިވެރިވެ އެދެތަރިންގެ ހަޔާތާ ބެހޭ ގޮތުން ވާހަކަ ދައްކާފަ އެވެ.

އެގޮތުން އެ ޝޯގައި ރަންވީރު ވަނީ ދީޕިކާއާ ދިމާވެ އެކުވެރިކަން ލޯތްބަށް ބަދަލުވެ އެ ގުޅުން އިތުރަށް ވަރުގަދަވި ގޮތް ބެލުންތެރިންނާ ހިއްސާ ކޮށްފަ އެވެ.

އޭގެ އިތުރުން ވެސް ޝޯގެ ތެރެއިން އެ ދެތަރިން ވަނީ އެ މީހުންގެ ކައިވެނީގެ ވީޑިއޯއެއް ހިއްސާކޮށްފަ އެވެ. އެ ވީޑިއޯގައި އެމީހުންގެ ކައިވެނީގެ އެކި ހަފްލާތައް ފެނިގެންދެ އެވެ.

ގިނަ ދުވަސްތަކެއް ވަންދެން ރައްޓެހިވެގެން އުޅުމަށްފަހު ރަންވީރާއި ދީޕިކާ ކައިވެނި ކޮށްފައިވަނީ 2018 ވަނަ އަހަރުގެ ނޮވެމްބަރު މަހުގެ 14 ވަނަ ދުވަހު އެވެ.