ބޮލީވުޑްގެ އެކްޓްރެސް ރަޝްމިކާ މަންދަނާގެ މޫނު ބޭނުންކޮށްގެން ހަދާފައިވާ ޑީޕްފޭކް ވީޑިއޯއާއެކު ބޮލީވުޑްގެ ގިނަ ތަރިން ކަންބޮޑުވުން ފާޅު ކުރަމުން އެބަދެ އެވެ.

ރަޝްމިކާގެ މޫނު ސިފަވާ ގޮތަށް ހަދާފައިވާ އެ ވީޑިއޯއަކީ ބޭއަދަބީ މަންޒަރުތައް އެކުލެވޭ ހުތުރު ވީޑިއޯ އެކެވެ. މިއީ އޭނާގެ އަބުރާއި އިއްޒަތަށް އަރައިގަތުން ކަމުގައި އޭނާ ބުންޏެވެ.

ރަޝްމިކާގެ ދިފާއުގައި ބޮލީވުޑުން އެންމެ ފުރަތަމަ އަޑު އުފުލި އެއް ތަރިއަކީ އަމީތާބް ބައްޗަން އެވެ. އަމީތާބް ވަނީ މި މައްސަލައާ ގުޅިގެން އެކަށޭނަ ފިޔަވަޅު އަޅަން އިދާރާތަކަށް ގޮވާލާފަ އެވެ.

އޭގެ ފަހުން ބޮލީވުޑްގެ އެހެން ތަރިން ވެސް އޭނާއަށް ސަޕޯޓުކޮށް ސޯޝަލް މީޑިއާގައި އަންނަނީ ޝުއޫރު ފާޅު ކުރަމުންނެވެ. ބޮލީވުޑް ތަރިންގެ އިތުރުން ގިނަ އާއްމުން ވެސް އަންނަނީ އޭނާއަށް ހިތްވަރު ދެމުންނެވެ.

މި މައްސަލައާއެކު އެ ވީޑިއޯގައި ފެންނަ އަސްލު އަންހެން މީހާ ވެސް ވަނީ ހިނގަމުން އަންނަ ކަންކަމާ މެދު ހިތާމަކުރާ ކަމަށާއި އެކަމުގައި އޭނާގެ އެއްވެސް ބައިވެރިވުމެއް ނޯންނާނެ ކަމަށް ބުނެފަ އެވެ.

"ޕުޝްޕާ: ދަ ރައިޒް"އިން ގިނަ ބައެއްގެ ސަމާލުކަން ހޯދި ރަޝްމިކާ ވަނީ އޭނާއަށް ލިބެމުން އަންނަ ތަރުހީބަށްޓަކައި ބޮލީވުޑްގެ ތަރިންނާއި އާއްމުންނަށް ވެސް ޝުކުރު އަދާކޮށްފަ އެވެ.