1992 ވަނަ އަހަރު ރިލީޒްކުރި ބޮލީވުޑްގެ ފިލްމު "ބާޒީގަރް"އަކީ އޭރުވެސް މިހާރުވެސް އާއްމުންގެ މެދުގައި މަގުބޫލު ފިލްމެެކެވެ. އެ ފިލްމަށް 30 އަހަރު ފުރުމުގެ މުނާސަބަތުގައި އެފިލްމުގެ ލީޑު ކާޖޮލް މިވަނީ އޭގެ ހަނދާންތައް އާކޮށްފަ އެވެ.

އިންސްޓަގްރާމްގައި ކާޖޮލް ކުރި ޕޯސްޓެއްގައި އޭނާ ބުނެފައިވަނީ "ބާޒީގަރް"އަކީ ހަނދާނުން ފުހެލަން ދަތި ފިލްމެއް ކަމަށާއި އެއީ އެތައް ތަރިންނަކާއެކު ފުރަތަމަ ފަހަރަށް މަސައްކަތް ކުރަން ލިބުނު ފުރުސަތު ކަމަށް ބުނެފަ އެވެ.

އެގޮތުން ކާޖޮލްއާއެކު ގިނަ ފިލްމުތަކެއް ކުޅެފައިވާ ޝާހްރުކް ޚާންގެ ނަން އޭނާ ފާހަގަކުރި އެވެ. ބާޒީގަރްއަށް ފަހު ޝާހްރުކް ޚާންއާއި ކާޖޮލް ވެގެންދިޔައީ އާއްމުންގެ މެދުގައި މަގްބޫލު ޖޯޑަކަށެވެ.

ބާޒީގަރް ފިލްމަކީ އާއިލީ މައްސަލަތަކެއްގެ ތެރެއިން ބަދަލު ހިފުން ދައްކުވައިދޭ ފިލްމެކެވެ. އެ ފިލްމުގައި ޝާހުރުކް ޚާންއާއި ކާޖޮލްގެ އިތުރުން ޝިލްޕާ ޝެޓީއާއި ޖޯނީ ލިވާ މުހިއްމު ރޯލުތަކުން ފެނިގެންދިޔަ އެވެ.

"ބާޒީގަރް" ފިލްމު ވަނީ ދިވެހި ބަހުން ވެސް ރިމޭކް ކުރެވިފަ އެވެ. އަސްލަމް ރަޝީދު ޕްރޮޑިއުސްކޮށް "ހީލަތް"ގެ ނަމުގައި އުފެއްދި އެ ފިލްމުން ފެނިގެން ދިޔައީ ރީކޯ މޫސާ މަނިކުއާއި އައިޝަތު ޝިރާނީ އެވެ.