ބޮލީވުޑްގެ ސުޕްސްޓާރު ޝާހްރުކް ޚާންއާއި އޭނާގެ އަންހެން ދަރިފުޅު ސުހާނާ ޚާން އެކުގައި ފިލްމަކަށް ހަމަޖެހިފައިވާ ކަމަށް ހަބަރުތައް ބުނެފި އެވެ.

ވަގުތީ ގޮތުން "ދަ ކިންގް" ނަން ދެވިފައިވާ އެ ފިލްމަކީ ބޮލީވުޑްގެ ކާމިޔާބު ގިނަ ފިލްމުތަކެއް ޑައިރެކްޓް ކޮށްދީފައިވާ ސުޖޯއީ ގޯޝްގެ ޑައިރެކްޝަނެކެވެ.

ދެބަފައިންގެ އެ ފިލްމަކީ އެކްޝަން ތްރިލާއެއް ކަމަށާއި މިހާރު ކުރެވެމުން އަންނަނީ ސްކްރިޕްޓްގެ އެންމެ ފަހުގެ މަސައްކަތްތައް ކަމަށް ހަބަރުތައް ބުނެ އެވެ. އަދި ފިލްމުގެ އަމަލީ މަސައްކަތް ފެށޭނީ އަންނަ އަހަރުގެ ނޮވެމްބަރުގައި ކަމަށްވެސް ބުނެ އެވެ.

ޝާހު ސުހާނާއާއެކު ފިލްމަށް އެއްބަސްވެފައިވާއިރު ސުހާނާގެ އެންމެ ފުރަތަމަ ފިލްމު "ދަ އާޗީސް" އަންނަ މަހުގެ ހަތްވަނަ ދުވަހު ނެޓްފްލިކްސްއަށް އަންނާނެ އެވެ.

ޝާހްރުކް ޚާންގެ ކުރިއަށް އޮތް ފިލްމު ވެސް ނެރެން ހަމަޖެހިފައިވަނީ ޑިސެމްބަރު މަހު އެވެ. ރާޖް ކުމާރް ހިރާނީގެ "ޑަންކީ" ސިނަމާތަކަށް އަންނާނީ އަންނަ މަހުގެ 22ގަ އެވެ.