މަޝްހޫރު އާޗީ ކޮމިކްސްގެ މައްޗަށް ބިނާކޮށް ހަދާފައިވާ ނެޓްފްލިކްސް ފިލްމު "ދަ އާޗީސް" އަންނަ މަހު ރިލީޒްކުރަން ތައްޔާރުވެފައިވާއިރު އެ ފިލްމުގެ އަޑު މީޑިއާގައި ވަނީ ގަދަވެފަ އެވެ.

ދަ އާޗީސްގައި ސުހާނާ ޚާން، ޚުޝީ ކަޕޫރު، އަގަސްތުޔާ ނަންދާ، ވެދާންގް ރައިނާ، މިހިރް އަހޫޖާ، އަދިތީ ސެއިގަލް އަދި ޔުވްރާޖް މެންދާ ފެނިގެންދާނެ އެވެ. މިއީ އެ ހުރިހާ ތަރިންގެ ވެސް ފުރަތަމަ ފިލްމެވެ.

އެހެން ނަމަވެސް ފިލްމުގެ ޑައިރެކްޓަރު ޒޯޔާ އަޚްތަރު މިވަނީ ފިލްމުގެ ތަރިންގެ ތެރެއިން ވަކި ތަރިންތަކަކަށް މީޑިއާއިން މާ ބޮޑަށް ސަމާލުކަން ދޭތީ ކަންބޮޑުވުން ފާޅުކޮށްފަ އެވެ.

ޒޯޔާ ބުނީ ފިލްމުގެ ޕޯސްޓަރުގައި ހަތް ކުދިން ހިމެނޭ ކަމަށާއި އެހެން ނަމަވެސް މީޑިއާއިން ވާހަކަ ދައްކަނީ އެންމެ ތިން ކުދިންނާ ބެހޭ ގޮތުން ކަމަށެވެ. ޒޯޔާ އެ އިޝާރާތް ކުރަނީ ސުހާނާ ޚާން، ޚުޝީ ކަޕޫރު އަދި އަގަސްތުޔާ ނަންދާ އަށެވެ.

މި ތިން ތަރިންނަކީ ބޮލީވުޑްގެ ނުފޫޒުގަދަ އާއިލާތަކަށް ނިސްބަތްވާ ތަރިންނެވެ. ސުހާނާއަކީ ޝާހްރުކް ޚާންގެ ދަރިއަކަށްވާއިރު ޚުޝީއަކީ ސްރީދޭވީގެ ދަރިފުޅެވެ. އަދި އަގަސްތުޔާއަކީ އަމީތާބް ބައްޗަންގެ ކާފަ ދަރިއެކެވެ.

ހަތް ކުދިން ހިމެނޭ ސްޓާ ކާސްޓެއްގެ ތެރެއިން ވަކި ބަޔަކަށް "ސްޕޮޓް ލައިޓް" ދިނުމަކީ ދެންތިބި ތަރިންނަށް އެކަމުގެ ނޭދެވޭ އަސަރު ކުރާނެ ކަމެއް ކަމަށް ޒޯޔާ ބުންޏެވެ. އަދި އެކަން ހުއްޓުމަށް އޭނާ މީޑިއާގެ ކިބައިިން އެދުނެވެ.

"ދަ އާޗީސް" ނެޓްފްލިކްސްއަށް އަންނާނީ ކުރިއަށް އޮތް ޑިސެމްބަރު މަހުގެ ހަތްވަނަ ދުވަހު އެވެ.