ސްޓާ ބާރަޓްއިން މިހާރު ދައްކަމުން އަންނަ ޓީވީ ސީރީޒް ސޯބަގްޔަވަތީ ބަވާގެ ޝޫޓިންގެ ތެރެއިން އެ ޝޯގެ ލީޑު ތަރި ކަރަންވީރު ބޮހްރާއަށް އަނިޔާވެއްޖެ އެވެ.

އިންޑިއާގެ ނޫސްތަކުން ބުނާ ގޮތުގައި ކަރަންވީރަށް އަނިޔާވީ ބާރު ސްޕީޑްގައި ދުވަން ޖެހޭ މަންޒަރެއް ކުޅުމުގެ ތެރޭގައި ކައްސާލައި ވެއްޓިގެންނެވެ.

ކަރަންވީރް ވެއްޓުމާއެކު ޝޯގެ އޮފިޝަލުން ވަނީ ޝޫޓިން މެދުކަނޑާލައި ކައިރީގައި ހުރި ކްލިނިކަކުން ކަރަންވީރަށް ސިއްހީ ފަރުވާ ދީފަ އެވެ.

އެކަމާ ބެހޭ ގޮތުން ވާހަކަ ދައްކަމުން ކަރަންވީރު ބުނީ އެ މަންޒަރަކީ ޝޯގައި އޭނާގެ ދަރިފުޅު ސަލާމަތްކުރަން ޖެހޭ މަންޒަރެއް ކަމަށާއި އެހެން ކަމުން އޭނާ ޝޫޓިންގެ ތެރެއަށް ގެއްލުނު ވަރުން އެހެން ކަމަކަށް ފަރުވާ ނުބެހެއްޓުނީ ކަމަށެވެ.

"އަހަރެން ވެއްޓުނީ އަނގަވަތަށް ކަކުލާއި އުޅަނބޮށި ޖެހޭ ގޮތަށް. އެއީ ބިގްބޮސްގައި ވެސް އަހަންނަށް އަނިޔާވި ކަކޫ. ވަރަށް ތަދުވި" ކަރަންވީރު ބުންޏެވެ.

ކަރަން އިތުރަށް ބުނީ ހާދިސާ ހިނގިއިރު އޭނާގެ އަންހެނުން ތީޖޭ ވެސް އެތަނުގައި އިން ކަމަށާއި އޭނާ ހީކުރީ އެ ވެއްޓުމަކީ މަންޒަރުގެ ބައެއް ކަމަށެވެ.

ކަރަންގެ އަނިޔާއާއެކު ގިނަ ބަޔަކު އޭނާއަށް ހިތްވަރު ދެމުން އަންނައިރު ކަރަން ވަނީ އެ އެންމެންނަށް ސޯޝަލް މީޑިއާ މެދުވެރިކޮށް ޝުކުރު އަދާކޮށްފަ އެވެ.