ބޮލީވުޑްގެ އެންމެ ނުފޫޒުގަދަ އެއް އާއިލާ ކަމަށްވާ "ބައްޗަން" އާއިލާ ވަނީ ދާދި ފަހުން އިންޑިއާގެ ވެރިރަށް ދިއްލީގައި އޮތް އިވެންޓެއްގައި ބައިވެރިވެފަ އެވެ.

އެ އިވެންޓްގައި އެ އާއިލާގެ ގިނަ މެމްބަރުން ބައިވެރިވިއިރު އާއްމުންނަށް އެންމެ ބޮޑަށް ފާހަގަވީ އަބީޝޭކް ބައްޗަން އޭނާގެ އިސްތަށިގަނޑަށް ހަދާފައިވާ ހުރި ގޮތެވެ.

ވަރުގަދަ އިސްތަށިގަނޑެއް ހުންނަ އަބީޝޭކް މިފަހަރު ފެނުނީ އިސްތަށިގަނޑު ތުނިކޮށް ކޮށާލައި "ބަޒް ކަޓް"އެއްގަ އެވެ. މިއީ މިހާރު މަގުބޫލު ވަމުން އަންނަ ސްޓައިލެކެވެ.

އެ އިވެންޓުގެ ތެރެއިން ނަގާފައިވާ އަބީޝޭކްގެ ފޮޓޯތައް އިންޓަނެޓުގައި ދައުރުވަމުން އަންނައިރު ގިނަ މީހުން އަންނަނީ އަބީޝޭކްގެ އާ ސްޓައިލް އޭނާއާ މާ ގުޅޭ ކަމަށް ބުނެ ތައުރީފް ކުރަމުންނެވެ.

ފިލްމީ މަސައްކަތްތަކަށް ބަލާއިރު އަބީޝޭކް އެންމެ ފަހުން ފެނިގެންދިޔައީ ފިލްމު "ގޫމަރް"އިންނެވެ. އެ ފިލްމަށް ބޮކްސް އޮފީހުގައި ލިބުނީ ލޮނުމަޑު ތަރުހީބެކެވެ.