އަންނަ މަހު ރިލީޒްކުރަން ހަމަޖެހިފައިވާ މިއުޒިކަލް ޑްރާމާ ފިލްމު "ދަ އާޗީސް"އަށް އެ ފިލްމުގެ ލީޑް އެކްޓަރެއް ކަމަށްވާ ސުހާނާ ލަވައެއް ކިޔައިދީފި އެވެ.

އިންސްޓަގްރާމްގައި އެކަން ހިއްސާ ކުރަމުން ސުހާނާ ވަނީ އެ ފުރުސަތަށްޓަކައި ފިލްމުގެ ޑައިރެކްޓަރު ޒޯޔާ އަޚްތަރުއަށާއި މިއުޒިކް ޑައިރެކްޓަރު ޝަންކަރު މަހާދޭވަންއަށް ޝުކުރު އަދާކޮށްފަ އެވެ.

"ޖަބް ތުމް ނަ ތީން" ނަމަކަށް ދީފައިވާ އެ ލަވައިގައި ސުހާނާގެ އިތުރުން އެ ފިލްމުގެ އެހެން އެކްޓަރެއް ކަމަށްވާ ޑޮޓްގެ އަޑުވެސް އިވިގެންދާނެ އެވެ.

މިއީ ސުހާނާ ފިލްމަކަށް ލަވައެއް ކިޔައިދިން ފުރަތަމަ ފަހަރެވެ. ފާހަގަ ކޮށްލަން ޖެހޭ އަނެއް ކަމަކީ އެ ފިލްމަކީ ސުހާނާ އެކްޓް ކުރުމުގެ ދާއިރާއަށް ވެސް ނުކުންނަ ފިލުމު ކަމެވެ.

ސުހާނާގެ އިތުރުން ވެސް ބޮލީވުޑްގެ ސްޓާ ކިޑްސްގެ ގޮތުގައި ބެލެވޭ ޚުޝީ ކަޕޫރު އަދި އަގަސްތުޔާ ނަންދާ ވެސް އެ ފިލްމުން ބޮލީވުޑަށް ތައާރަފްވާނެ އެވެ.

ޖުމްލަ 16 ވަރަކަށް ލަވަ ހިމެނޭ އެ މިއުޒިކަލް ނެޓްފްލިކްސްގައި ރިލީޒް ކުރާނީ އަންނަ ޑިސެމްބަރު މަހުގެ ހަތްވަނަ ދުވަހު އެވެ.