ސަލްމާން ޚާންގެ އެންމެ ފަހުގެ ފިލްމު "ޓައިގާ 3"އަށް ބޮކްސް އޮފީހުގައި ބޮޑު ކާމިޔާބީއެއް ލިބެމުން އަންނައިރު އޭގެ ކުރިން ނުކުތް އޭނާގެ ފިލްމުތައް ފްލޮޕްވި ހަނދާން އެއްވެސް މީހަކު ނެތް ކަހަލަ އެވެ.

ޓައިގާ 3ގެ ކުރިން ނުކުތް ސަލްމާންގެ ތިން ފިލްމު ކަމަށްވާ "ރާދޭ"، "އަންތިމް" އަދި "ކިސީކީ ބާއީ ކިސީކީ ޖާން"އަށް ބޮކްސް އޮފީހުގައި ލިބުނީ ވަރަށް ފިނި ތަރުހީބެކެވެ.

އެންމެ ފަހުން ސަލްމާން މިވަނީ އޭނާގެ ފަހުން ނުކުތް ފިލްމުތައް ފްލޮޕްވި ސަބަބުތަކާ ބެހޭ ގޮތުން ފުރަތަމަ ފަހަރަށް އާއްމުކޮށް ވާހަކަ ދައްކާފަ އެވެ.

ސަލްމާން ބުނީ އެ ފިލްމުތައް ރިލީޒް ކުރެވުނު ދުވަސްވަރު ރަނގަޅު ނޫނީ ކަމަށާއި އެ ފިލްމުތައް މިހާރު ރިލީޒްކޮށްފިނަމަ ލިބޭ އާމްދަނީ މާ ބޮޑަށް ވެސް ރަނގަޅުވީސް ކަމަށެވެ.

"ކިސީކީ ބާއީ ކިސީކީ ޖާން" ފްލޮޕްވާން މެދުވެރިވި އިތުރު ސަބަބެއްގެ ގޮތުގައި ސަލްމާން ފާހަގަކުރީ އެ ފިލްމުގެ ޓިކެޓުތައް ޑިސްކައުންޓް އަގެއްގައި ވިއްކުމެވެ.

ޓައިގާ 3އަށް 450 ކްރޯޑް ރުޕީސް ލިބެން ކައިރިވެފައިވާއިރު ސަލްމާންގެ ކުރިއަށް ހުރި ފިލްމުތަކުގެ މަސައްކަތް ވެސް ބާރަށް ކުރިއަށް ދެ އެވެ.