ބޮލީވުޑްގެ މަޝްހޫރު އާއިލާތަކުގެ އަރަމުން އަންނަ ޖީލުގެ ބައެއް ތަރިން ފެނިގެންދާ ފިލްމު "ދަ އާޗީސް"އަށް އެ ދާއިރާގެ ތަރިންގެ ލޯބި ބަންޑުން ކޮށްލައިފި އެވެ.

އާ ތަރިންނަށް އޮތް ތަރުހީބު ބޮލީވުޑުން ދައްކާލާފައިވަނީ "ދަ އާޗީސް" އާއްމުކޮށް ނެރުުމުގެ ކުރިން ތަރިންނަށް ހާއްސަކޮށްގެން ބޭއްވި ފިލްމުގެ ހާއްސަ ޝޯއެއްގަ އެވެ.

މިދިޔަ އަންގާރަ ދުވަހުގެ ރޭ އޮތް އެ ޕްރިމިއާ ޝޯގައި ބޮލީވުޑްގެ ނަންކިޔާ މަޝްހޫރު ގިނަ ފަންނާނުން ބައިވެރިވި އެވެ. އޭގެ ތެރޭގައި ފިލްމުގެ ތަރިންގެ އާއިލާތައް ވެސް ހިމެނެ އެވެ.

އެގޮތުން ފިލްމުން ފެނިގެންދާ ސުހާނާ ޚާންގެ މައިންބަފައިން ކަމަށްވާ ޝާހްރުކް ޚާންއާއި ގައުރީ ޚާންގެ އިތުރުން އޭނާގެ އާއިލާ ފާހަގަ ކުރެވުނެވެ.

ހަމައެއާއެކު ބައްޗަން އާއިލާގެ އަގަސްތުޔާ ނަންދާއަށް ތަރުހީބު ދިނުމުގެ ގޮތުން އެ އާއިލާގެ ގިނަ މެމްބަރުންތަކެއް ވެސް އެ ސްކްރީނިންއަށް ގޮސްފައިވެ އެވެ.

ޚުޝީ ކަޕޫރުގެ އާއިލާއިން ޝޯއަށް ގޮސްފައިވަނީ އޭނާގެ ބައްޕަ ބޮނީ ކަޕޫރާއި ބޭބެ އަރްޖުން ކަޕޫރުގެ އިތުރުން ދައްތަ ޖާންވީ ކަޕޫރެވެ.

މި ނޫނަސް ބޮލީވުޑްގެ މަޝްހޫރު އެހެނިހެން ޝަހްސިއްޔަތުން ވެސް ޝޯގެ ރަތް ދޫލައިން ފެނިފައިވެ އެވެ. އެ ޝޯ ވެގެން ގޮސްފައިވަނީ މިފަހަކަށް އައިސް ބޮލީވުޑްގެ އެންމެ ގިނަ ތަރިން އެއް ތަނަކުން ފެނުނު ހަފްލާއަށެވެ.

މަޝްހޫރު ކޮމިކް ސާރީޒް"އާޗީސް"ގެ މައްޗަށް ބިނާކޮށް ޒޯޔާ އަޚްތަރު ޑައިރެކްޓް ކޮށްފައިވާ މި ފިލްމު ނެޓްފްލިކްސްގައި އާއްމުކޮށް ނެރުމަށް ހަމަޖެހިފައިވަނީ މިއަދުގެ ވަގުތެއްގަ އެވެ.