ބޮލީވުޑްގެ ތަރި އަމީތާބު ބައްޗަންގެ މައިދައިތަ އަދި އެކްޓްރެސް ޖާޔާ ބައްޗަންގެ މަންމަ އިންދިރާ ބަދޫރީގެ ހާލު ދެރަވެ ހޮސްޕިޓަލުގައި އެނދުމަތި ކޮށްފި އެވެ.

އިިންޑިއާގެ ނޫސްތަކުން ބުނާ ގޮތުގައި އިންދިރާއަށް ހޮސްޕިޓަލުގައި ފަރުވާ ދޭން ފެށީ ހިތުގެ މައްސަލަތަކަކާ ގުޅިގެންނެވެ. ބުނެވޭ ގޮތުގައި ކުރިއަށް އޮތް ތަނުގައި ހިތަށް ޕޭސްމޭކާއެއް ލައްވާނެ އެވެ.

މިހާރު އުމުރުން 93 އަހަރުގެ އިންދިރާއަށް ފަރުވާ ދެމުން އަންނަނީ މުމްބާއީގައި ހުންނަ ހިންދޫޖާ ހޮސްޕިޓަލުންނެވެ. އެ ހޮސްޕިޓަލުގެ ކައިރިން އަމީތާބާއި ޖާޔާ ވެސް ވަނީ ފެނިފަ އެވެ.

ހިތަށް ޕޭސްމޭކާ ލައްވަނީ ހިތުގެ ހިނގުން ހަމައަކަށް އަޅުވައި ވިންދު އަވަސް ކުރުމަށްޓަކަ އެވެ. މި ސާޖަރީއަކީ އާއްމުކޮށް ހިތުގެ ވިންދު ދަށްކޮށް ހުންނަ މީހުން ކުރަންޖެހޭ ސާޖަރީ އެކެވެ.

2020 ވަނަ އަހަރު 90 ވަނަ އުފަން ދުވަސް ފާހަގަކުރި އިންދިރާ ފާހަގަ ކުރެވެނީ އުމުރާ އަޅާބަލާއިރު ހަރަކާތްތެރި އަދި ނިސްބަތުން ސިއްހަތުވެސް ރަނގަޅު މީހެއްގެ ގޮތުގަ އެވެ.

އެހެން ނަމަވެސް ފަހަކަށް އައިސް އޭނާގެ ސިއްހީ ހާލަތު ވަނީ ދަށްވާން ފަށާފަ އެވެ.