އިއްޔެއަކީ ބޮލީވުޑްގެ ތަރި ސަލްމާން ޚާންގެ އުފަން ދުވަހެވެ. އޭނާއަކީ އާއްމުކޮށް މީޑިއާއާ ރައްޓެހި ތަރިއެއް ނަމަވެސް އޭނާގެ ހަޔާތުގެ ބައެއް ކަންކަން މީޑިއާއަށް ވަނީ ފޮރުވިފަ އެވެ. އޭގެ ތެރެއިން ބައެއް ކަންކަމަށް ބަލާލާނަމެވެ.

ފުރަތަމަ ހުށައެޅުނީ "ބާޒީގަރް"

ސަލްމާން ފިލްމީ ދާއިރާއަށް ނުކުތީ 1989 ވަނަ އަހަރު ނުކުތް ފިލްމު "މެއިނޭ ޕްޔާރު ކިޔާ"އިންނެވެ. އެހެން ނަމަވެސް އޭނާއަށް އެންމެ ފުރަތަމަ ހުށައެޅުނީ 1993 ވަނަ އަހަރު ނުކުތް "ބާޒީގަރު" އެވެ. ސަލްމާން އެ ފިލްމު ދޫކޮށްލީ ފުރަތަމަ ފިލްމަކަށް ނެގެޓިވް ރޯލެއް ކުޅެން ބޭނުން ނުވާތީ އެވެ. ފަހުން އެ ރޯލުން ފެނިގެން ދިޔައީ ޝާހްރުކް ޚާން އެވެ.

މޮޅު ފެތުންތެރިއެއް

ސަލްމާނަކީ ވަރަށް މޮޅު ފެތުންތެރި އެކެވެ. އެކްޓަރަކަށް ވުމުގެ ކުރިން ކެރިއަރެއްގެ ގޮތުގައި ފެތުން ހިޔާރުކޮށް ގައުމީ ފެންވަރުގައި އެ ކުޅިވަރު ކުޅެން އޭނާ ބޭނުންވި އެވެ.

ކުރެހުމުގެ ފަންނަން ބޮޑު ލޯތްބެއް

ފިލްމީ މަސައްކަތްތަކުގެ އިތުރުން ސަލްމާންއަކީ އޭނާއަށް ލިބޭ ހުސް ވަގުތުތަކުގައި ކުރަހާ ވެސް މީހެކެވެ. އޭނާގެ ފަންނީ މަސައްކަތެއް އެކްޓަރު އާމިރު ޚާންގެ ގޭގައި ވެސް ހުރެ އެވެ.

ސައިބޯނި އެއްކުރޭ

ސަލްމާންގެ ގޭގައި ސައިބޯނީގެ ބޮޑު ކަލެކްޝަންއެއް ހުންނަ ކަމަށް ބައެއް ރިޕޯޓުތައް ބުނެ އެވެ. ސަބަބަކީ އޭނާ އެކި ވަސް ދުވާ ސައިބޯނިތަކަށް ލޯބި ކުރުމެވެ.