ރައްޔިތުންގެ މަޖިލިހުގެ ހުޅުމާލެ ދާއިރާގެ މެމްބަރު އަލީ ނިޔާޒު (ނިޔާ)، ކުރިއަށް އޮތް 20 ވަނަ މަޖިލިހުގެ އިންތިހާބުގައި ކުރެންދޫ ދާއިރާގެ ގޮނޑި އަށް ވާދަ ކުރައްވާނެ ކަން މިއަދު އިއުލާން ކުރައްވައިފި އެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ކޮއްކޯފުޅު ނިޔާޒް ފޭސްބުކްގައި ކުރެއްވި ޕޯސްޓެއްގައި ވިދާޅުވީ 18 ވަނަ އަދި 19 މަޖިިލީހަށް ކުރެންދޫ ދާއިރާއިން މެޖޯރިޓީ ދީ އިންތިހާބު ކުރީ އެމްޑީޕީގެ މެމްބަރުން ކަމަށެވެ.

އަށާރަ ވަނަ މަޖިލީހުގެ ކުރެންދޫ ދާއިރާގެ މެމްބަރަކީ އަބުދުދުލް ބާރީ އެވެ. އަދި މިހާރު ހިނގަމުންދާ 19 ވަނަ މަޖިލިހުގެ ކުރެންދޫ ދާއިރާގެ މެމްބަރަކީ އަބްދުލްޣަނީ އެވެ. އޭނާ އެމްޑީޕީގެ ޓިކެޓުގައި އިންތިހާބުވެޑައިގަތަސް، ވަރަށް ފަހުން އޭނާ ވަނީ ވެރިކަން ކުރާ ޕީއެންސީ އަށް ސޮއި ކުރައްވައިފަ އެވެ.

ނިޔާ ވިދާޅުވީ އަންނަ 20 ވަނަ މަޖިލީހަށް ވެސް ކުރެންދޫ ދާއިރާގެ ރައްޔިތުން ހޮވާނީ އެމްޑީޕީގެ ކެންޑިޑޭޓެއް ކަމަށެވެ.

ނިޔާޒް މިހާރު ތަމްސީލްކުރައްވަމުން ގެންދަވާ ހުޅުމާލެ ދާއިރާ މިފަހަރުގެ އިންތިހާބަށް ވަނީ ތިން ދާއިރާއެއްގެ ގޮތުގައި ހަމަޖައްސައިފަ އެވެ. އެއީ ހުޅުމާލެ އުތުރު، ހުޅުމާލެ މެދު އަދި ހުޅުމާލެ ދެކުނު ދާއިރާ އެވެ.