ކުޅުދުއްފުށީ ރީޖަނަލް ހޮސްޕިޓަލް (ކޭއާރްއެޗް)ގެ ޗީފް އެގްޒެކެޓިވް އޮފިސަރު (ސީއީއޯ) ގެ މަގާމަށް އައިޖީއެމްއެޗުގައި ސީނިއާ ނަރުހެއްގެ ގޮތުގައި މަސައްކަތް ކުރެއްވި ނާޒިމާ އަލީ ހަމަޖައްސައިފި އެވެ.

ކުޅުދުއްފުއްޓަން އުފަން ނާޒިމާ ވަނީ އައިޖީއެމްޗުގެ ގައިނީވޯޑުގެ ސީ، ޑީގެ ވޯޑް މެނޭޖަރެއްގެ ގޮތުގައި ކުރިން މަސައްކަތް ކުރައްވައިފަ އެވެ. ނަމަވެސް ކޮވިޑް-19 އަށް ފަހު، ސަރުކާރުގެ މައި ހޮސްޕިޓަލުގެ ވަޒީފާ އިން ވަކިވެވަޑައިގެން ކުޅުދުއްފުއްޓަށް ވަޑައިގެން ރީޖަނަލް ހޮސްޕިޓަލްގައި މަސައްކަތް ކުރައްވަން ފެއްޓެވި އެވެ. އޭގެ ފަހުން އަނެއްކާ ވެސް މާލެ ވަޑައިގެން އައިޖީއެމްއެޗުގެ ނާސިން ކޯޑިނޭޓަރެއްގެ ގޮތުގައި ވަނީ މަސައްކަތް ކުރައްވައިފަ އެވެ. އެ މަގާމުން ވަކިވެވަޑައިގެންނެވީ ޕީޕީއެމް/ޕީއެންސީގެ މަޖިލިސް ޕްރައިމަރީގައި ކުޅުދުއްފުށީގެ ގޮނޑިއަކަށް ވާދަކުރެއްވުމަށެވެ. އުތުރުގެ އެންމެ ބޮޑު އެއް ހޮސްޕިޓަލުގެ އެންމެ މަތީ މަގާމަށް ނާޒިމާ ހަމަޖައްސާފައި މި ވަނީ އެ ޕްރައިމަރީން އޭނާ އަށް ނާކާމިޔާބުވެފައި ވަނިކޮށެވެ.

ނާޒިމާ ވަނީ 2019 ވަނަ އަހަރުގެ މަޖިލިސް އިންތިޚާބުގައި ވެސް ކުޅުދުއްފުށީ ޕީޕީއެމް ޕްރައިމަރީގައި ވާދަކުރައްވައިފަ އެވެ.

ނާސިން އިން ޑިގްރީ ހައްދަވާފައިވާ ނާޒިމާ ވަނީ ރަޖިސްޓާޑް ނާސް، ސީނިއާ ރެޖިސްޓާޑް ނާސް، ކްލިނިކަލް ނާސް އަދި ވޯޑް މެނޭޖަރުކަން ކުރައްވައިފަ އެވެ.

އެމްޑީޕީ ސަރުކާރުގައި ކޭއާރްއެޗުގެ ސީއީއޯގެ މަގާމުގައި ހުންނެވީ އަހުމަދު ދާއޫދު (ޑޭވިޑް) އެވެ. ބިޒިނަސް އެޑްމިނިސްޓްރޭޝަން އިން މާސްޓާސް ހައްދަވާފައިވާ ޑޭވިޑް ސީއީއޯގެ މަގާމަށް ބަދަލުކުރެއްވިއިރު ހުންނެވީ އެ ހޮސްޕިޓަލުގެ މެނޭޖަރަކަށެވެ.