މާލޭގެ ގްރޫޕަކުން އަނިޔާވެރި ގޮތަކަށް ރ. މީދޫ، ފެންފިޔާޒުގޭ، މުހައްމަދު އަނަސް މަރާލި މައްސަލައިގައި ދައުލަތުން ދައުވާ އުފުލި އެންމެންގެ މައްޗަށް ވެސް ކުށް ސާބިތު ނުވާ ކަމަށް ކްރިމިނަލް ކޯޓުން އިއްވި ހުކުމް ޕްރޮސިކިއުޓާ ޖެނަރަލްގެ އޮފީހުން ހައި ކޯޓުގައި އިސްތިއުނާފުކޮށްފި އެވެ.

އަނަސް މަރުގެ މައްސަލަ ޕްރޮސިކިއުޓާ ޖެނަރަލްގެ އޮފީހުން އެ ކޯޓަށް ހުށަހަޅާފައި ވަނީ މިދިޔަ ބުރާސްފަތި ދުވަހު އެވެ. އަނަސްގެ މަރުގެ މައްސަލަ ބަލައިގަތުމާ ގުޅޭ ގޮތުން ކޯޓުން އަދި ގޮތެއް ނިންމާފައެއް ނުވެ އެވެ.

އަނަސް މަރާލާފައި ވަނީ 2017 ވަނަ އަހަރުގެ ޖުލައިމަހުގެ 17 ވަނަ ދުވަހުގެ ރޭ ގުރޫޕަކުން ގޮސް އޭނާއަށް ހަމަލާދީ ލިޓަސް ސާވިސް ސެންޓަރު ތެރޭގަ އެވެ.

މި މައްސަލައިގައި ގަސްދުގައި މީހަކު މަރާލުމުގެ ދައުވާކުރީ ޅ. ކުރެންދޫ އަސުރުމާގޭ އަހުމަދު ޒަޔާނާއި މ. ލޮނުމިދިލިގޭ އަފްރާހު އަބްދުއްރައްޒާގު އަދި މ. ދިމިޝްގު އުސްމާން ޝަރީފްގެ މައްޗަށެވެ.

ގަސްދުގައި މީހަކު މަރާލުމުގައި ބައިވެރިވުމުގެ ދައުވާ އުފުލީ ލ. ގަން ތުނޑި، ނަންނާރިގޭ ޖުނައިހު އަބްދުﷲ އާއި ދަފްތަރު ނަމްބަރު 1746 ސިމާހް މޫސާ އާއި ސ. ފޭދޫ ވެސްޓަންވިލާ ހަސަން މަހްފޫޒްގެ އިތުރުން ތ. ކިނބިދޫ ގުލްފާމްގޭ މުހައްމަދު ޝާޒްގެ މައްޗަށެވެ.

ކްރިމިނަލް ކޯޓުން އިއްވި ހުކުމްގައި ވަނީ މައްސަލައިގައި ދައުލަތުން ހުށަހަޅާފައިވާ ހެއްކާއި ގަރީނާތަކަށް ރިއާޔަތްކޮށް، އެ ހަތް މީހުން ކުށުގައި ބައިވެރިވާ ކަމަށް އެކަށީގެންވާ ޝައްކެތް ނެތް މިންވަރަށް ސާބިތުވާ ކަމަށް ކަނޑައެޅެން ނެތް ކަމަށެވެ. ސީސީޓީވީ ފުޓޭޖްތަކާއި ފުލުހުންގެ އިންޓެލިޖެންސް ރިޕޯޓުން ވެސް ކުށް ސާބިތު ކުރެވޭ ވަރަށް ހެކި ލިބިފައި ނުވާ އިރު، ފުޓޭޖްތަކުގެ ޗެއިން އޮފް ކަސްޓަޑީ ފުރިހަމަ ނުވާ ކަމަށް ހުކުމްގައިވެ އެވެ.

މި މައްސަލައިގައި 18 އަހަރު ނުވާ ކުޑަ ކުއްޖެއްގެ މައްޗަށް ވެސް ދައުވާ ކުރި އެވެ. އެކަމަކު، 2021 ވަނަ އަހަރު ޖުވެނައިލް ކޯޓުގައި ބޭއްވި އަޑުއެހުމުގައި އެކުއްޖާގެ މައްޗަށް ކުށް ސާބިތު ނުވާ ކަމަށް ނިންމާފައިވެ އެވެ.

ނަމަވެސް 2022 ވަނަ އަހަރު އެމައްސަލަ ހައިކޯޓަށް ހުށހެޅުމުން ހައިކޯޓުން ހުކުމް ކޮށްފައި ވަނީ އެކުއްޖާގެ މައްޗަށް ކުށް ސާބިތުވާ ކަމަށެވެ. އަދި އޭނާ 18 އަހަރަށް ޖަލަށް ލުމަށް ހުކުމް ކުރި އެވެ. އެކަމަކު ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި އެ ކުއްޖާގެ މައްޗަށް އިއްވި 18 އަހަރުގެ ޖަލު ހުކުމް ވަނީ 10 އަހަރަށް ލުއި ކޮށްދީފަ އެވެ.