މިދިޔަ މޭމަހު ޒަކާތު ފަންޑުން ބޭސްފަރުވާ ކުރުމަށް 180 މީހަކަށް 1.2 މިލިއަން ރުފިޔާގެ އެހީ ދީފައިވާ ކަމަށް މޯލްޑިވްސް ޒަކާތު ހައުސްއިން ބުނެފި އެވެ.

ޒަކާތު ހައުސްއިން ވަނީ މިދިޔަ މޭ މަހު ފަގީރުންނާއި މިސްކީނުންނަށް ބޭސްފަރުވާގެ އެހީ ދީފައިވާގޮތުގެ ތަފާސް ހިސާބުތައް އާއްމުކޮށްފަ އެވެ.

އެ ތަފާސްހިސާބުތަކުން ދައްކާގޮތުން މައިގަނޑު 4 ކަމަކަށް ޒަކާތު ފަނޑުން އެހީ ދީފައިވެ އެވެ. އެއީ ކެންސަރު ބައްޔަށް ފަރުވާ ކުރުމަށާއި، ހިތުގެ އޮޕަރޭޝަން ކުރުމަށާއި، ކިޑްނީ ބަލިތަކަށާއި، ސިކުނޑީގެ އޮޕަރޭޝަންތައް ކުރުމަށެވެ. އަދި އެހެނިހެން ބޭނުންތަކަށް ވެސް ޒަކާތު ފަންޑުން އެހީ ދީފައިވެ އެވެ.

ޒަކާތު ފަންޑުން އެހީދިން މިންވަރު:

  • ކެންސަރަށް ފަރުވާކުރުމަށް 454،574 ރުފިޔާ
  • ހިތުގެ އޮޕަރޭޝަންކުރުމަށް 67،848 ރުފިޔާ
  • ކިޑްނީ ބަލިތަކަށް 89،050 ރުފިޔާ
  • ސިކުނޑީގެ އޮޕަރޭޝަންތަކަށް 72،088 ރުފިޔާ
  • އެހެނިހެން ބަލިތަކަށް 619،113 ރުފިޔާ

ތަފާސްހިސާބުތައް ދައްކާގޮތުން މޭމަހު ޖުމްލަ 1.2 މިލިއަން ރުފިޔާ އެހީގެ ގޮތުގައި ހޭދަކޮށްފައިވެ އެވެ. އަދި އެ މަހުގެ ތެރޭ އެހީގެ ގޮތުގައި ވަނީ ޖުމްލަ 1.6 މިލިއަން ރުފިޔާ ޚަރަދުކޮށްފަ އެވެ.

މޭ މަހު ކުރެވިފައިވާ ޚަރަދުތަކުގެ ތެރޭގައި އޭޕްރިލް މަހު އެހީ ހަމަޖެހިފައިވާ ފަރާތްތަކުގެ ޚަރަދުތައް ވެސް ހިމެނިފައިވާނެ ކަމަށް ޒަކާތު ހައުސްއިން ބުނެ އެވެ.

ތަފާސްހިސާބުތަކުން ދައްކާގޮތުން އެހެނިހެން ޚަރަދުތަތަކުގެ ތަފްސީލްތައް ވެސް ވަނީ ހިއްސާކޮށްފަ އެވެ. އެހެނިހެން ޚަރަދުތަކުގެ ތެރޭގައި ހިމެނެނީ ފިތުރުޒަކާތުގެ ގޮތުގައި ދޫކޮށްފައިވާ ފައިސާ އާއި ޒަކާތުގެ މަސައްކަތްކުރުމަށް ޒަކާތު ފަންޑުން މުސާރަ ދޭގޮތަށް ނަގާފައިވާ މުވައްޒަފުންގެ އުޖޫރަ ދިނުމަށް ޢާމިލުންގެ ބައިން ކުރެވިފައިވާ ޚަރަދެވެ. އިދާރީ މުވައްޒަފުންގެ އުޖޫރައިގެގޮތުގައި މޭ މަހު ވަނީ 2.6 މިލިއަން ރުފިޔާ ޚަރަދުކޮށްފަ އެވެ.

ޒަކާތު ހައުސްއިން ބުނީ މޭ މަހު ފިތުރުޒަކާތުގެ ގޮތުގައި ދޫކޮށްފައިވާ ފައިސާގެ އަދަދަކަކީ އިދާރީ އަދި އެކައުންޓުތަކުގެ މައްސަލަތަކާއި ގުޅިގެން ރައްދުކުރެވިފައިނުވާ ފަރާތްތަކަށް ދޫކޮށްފައިވާ ފައިސާ ކަމަށެވެ. އެގޮތުން 41،937 ރުފިޔާ ވަނީ ފިތުރު ޒަކާތުގެ ގޮތުގައި މޭ މަހު ދޫކޮށްފަ އެވެ.

މީގެ ކުރިން ފިތުރު ޒަކާތް ނެގުމާއި ޒަކާތް ބެހުމުގެ މަސައްކަތް އިސްލާމިކް މިނިސްޓްރީން ކުރަމުން ގެންދިޔަ ނަމަވެސް މިހާރު އެ މަސައްކަތް ކުރަމުން އަންނަނީ އެކަމަށް ޚާއްސަކޮށް އުފައްދަވާފައިވާ ޒަކާތު ހައުސްއިންނެވެ.

ޒަކާތު ހައުސް ރައީސް އުފައްދަވާ، މި އިދާރާ އިފްތިތާހު ކޮށްފައި ވަނީ މިއަހަރުގެ ޖެނުއަރީ މަހުގެ ތެރޭގަ އެވެ.