ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރުކަމުން ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) މިއަދު އިސްތިއުފާ ދެއްވައިފި އެވެ.

އިސްތިއުފާ ދެއްވި ހަބަރާ ގުޅިގެން އޭނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ޕީއެންސީގެ ޕާލިއަންމަންޓަރީ ގްރޫޕްގެ ޑެޕިއުޓީ ލީޑަރުކަމުން އިންސްތިއުފާ ދެއްވީ، މިވަގުތު އަމިއްލަކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތު ދެވެން ނެތުމުގެ ސަބަބުން ކަމަށެވެ.

ރައީސް މުހައްމަދު މުއިއްޒު ހުށަހެޅުއްވި ގޮތަށް ޕީއެންސީގެ ޑެޕިއުޓީ ޕީޖީ ލީޑަރުކަމަށް ތޯރިގާއި ހުޅުދޫ ދާއިރާގެ މެންބަރު މުހައްމަދު ޝާހިދު އަދި، ވިލިމާލެ ދާއިރާގެ މެންބަރު މުހައްމަދު އިސްމާއީލް ހަމަޖައްސަން ޕީއެންސީގެ ޕީޖީ ގްރޫޕުން ނިންމީ އާ މަޖިލިސް އިންތިހާބު ވުމާއެކު މިއަހަރުގެ މޭ މަހުގަ އެވެ.

ތޯރިގް އަކީ ރައްޔިތުންގެ މަޖިލީހުގެ ރައީސާއި ނައިބު ރައީސް ނެތް ހާލަތްތަކުގައި ރިޔާސަތު ބަލަހައްޓަވާ ފަސް މެންބަރުންގެ ތެރޭގައި ވެސް ހިމެނިވަޑައިގަންނަވާ މެންބަރެކެވެ. އޭނާ އަކީ މަޖިލީހަށް ތިން ވަނަ ދައުރަށް ހޮވިވަޑައިގެންފައިވާ މެންބަރެކެވެ.

ގައުމީ ފުޓްބޯޅަ ޓީމަށް ވެސް ކުޅުއްވި ތޯރިގް އަންނަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސްކަމަށް ކެމްޕޭން ކުރައްވަމުންނެވެ. ޖެނުއަރީ މަހު ބާއްވަން އުޅުނު އެފްއޭއެމް އިންތިހާބުގައި ވާދަކުރައްވަން ތޯރިގް ހުށަހެޅުއްވި ކެންޑިޑޭސީ ބަލައި ނުގަންނަން އެފްއޭއެމްގެ އިލެކްޓޯރަލް ކޮމިޓީން އޭރު ވަނީ ނިންމައިފަ އެވެ.