މުސްލިމުންގެ ފުރަތަމަ ގިބްލަ އަލް މަސްޖިދުލް އަގްސާ މިސްކިތުގެ ތެރޭގައި ޔަހޫދީންގެ ފައްޅިއެއް އަޅަން އިޒްރޭލުގެ މިނިސްޓަރަކު ގޮވާލުމުން ރާއްޖޭގެ ސަރުކާރުން އެކަން ކުށްވެރިކޮށްފި އެވެ.

ފޮރިން މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނީ އެފަދަ ކަންކަމަށް ގޮވާލުމުން ގާޒާގައި ހިނގަމުން ގަތުލުއާންމު ހުއްޓާލަން ކުރެވޭ މަސައްކަތަށް ހުރަސްއެޅި އިތުރު ހަމަނުޖެހުންތައް އުފެދުމުގެ ފުރުސަތު ބޮޑުވާނެ ކަމަށެވެ.

ގުދުސްއާއި ފަލަސްތީނުގައިވާ ހުރުމަތްތެރި ތަންތަން ރައްކާތެރިކޮށް، ފަލަސްތީނުގެ ރައްޔިތުންގެ ހައްގުތައް ހިމާޔަތް ކުރަން އަވަސް ފިޔަވަޅުތަކެއް އެޅުމަށް ބައިނަލްއަގުވާމީ މުޖްތަމައުއަށް ދިވެހި ސަރުކާރުން ވަނީ ގޮވާލައިފަ އެވެ.

އަގްސާ މިސްކިތުގައި ފައްޅިއެއް އަޅަން ގޮވާލީ އިޒްރޭލުގެ ނެޝަނަލް ސެކިއުރިޓީ މިނިސްޓަރު އިޓްމާރު ބިން-ގްވިރް އިޒްރޭލުގެ އާމީ ރޭޑިއޯއަށް ދިން އިންޓަވިއުއެއްގަ އެވެ.

އިޒްރޭލުން އަބަދުވެސް އަގްސާ މިސްކިތަށް ވަދެ މުސްލިމުން ނަމާދުކުރަން ހުރަސްއަޅާ ހަމަނުޖެހުން ހިންގަ އެވެ. އެ މިސްކިތަށް އެހެން ދީންތަކުގެ މީހުން ޒިޔާރާތްކުރުމުގެ ހުއްދަ ދީފައި ވީނަމަވެސް، އަޅުކަން ކުރުމަކީ މަނާ ކަމެކެވެ.