ނުރައްކާތެރިކޮށް ލޯންޗު ދުއްވި ތިން ކެޕްޓަނުންގެ ލައިސަންސް ހިފަހައްޓާފައިވާކަމަށް ފުލުހުން މިއަދު ބުނެފި އެވެ.

ފުލުހުން މިމައްސަލަ ހޮނިހިރު ދުވަހު ބަލަންފެށީ ނުރައްކާތެރިކޮށް ވާދަޖަހަމުން ތިން ލޯންޗު ދުއްވާ ވީޑިއޯއެއް ސޯޝަލް މީޑިއާގައި އާއްމުވުމާ ގުޅިގެންނެވެ.

ސޯޝަލް މީޑިއާގައި ދައުރުވި އެ ވީޑިއޯއިން ފެންނަ ގޮތުގައި ނަސްރު ސްޕީޑް، ރިލެކްސް ގޯލްޑް އަދި ރަމްޒު ކުއީން ނަމަކަށް ކިޔާ ތިން ލޯންޗު ރަށެއްގެ ނެރަކަށް ވަންނަން ވަރަށް ބާރަށް ދުއްވާފައި ދެ އެވެ.

ފުލުހުން ބުނެފައިވަނީ ވީޑިއޯގައި ހިމެނޭ ލޯންޗުތަކަކީ އޯގަސްޓް 13 ވަނަ ދުވަހު އއ. އަތޮޅަށް ދަތުރުކުރި ލޯންޗުތަކެއް ކަމަށެވެ.

މިކަމާއި ގުޅޭގޮތުން މިއަދު ފުލުހުން ބުނެފައިވަނީ މި މައްސަލައިގާ ތިން ކައްޕިތާނެއްގެ ލައިސަންސް ހިފަހައްޓާފައިވާއިރު މައްސަލައާއި ގުޅޭ ލިޔެކިޔުންތައް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށް ފޮނުވުމުގެ މަސައްކަތް ފުލުހުން ކުރަމުން އަންނަ ކަމަށެވެ. އަދި މައްސަލައިގާ އަޅާނެ ދާއިމީ ފިޔަވަޅެއް ނިންމާނީ އެ މިނިސްޓްރީން ކަމަށެވެ.