އެމެރިކާގެ ރިޔާސީ ކެންޑިޑޭޑް އަދި ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލަން މަސައްކަތް ކުރި ކަމަށް ބެލެވޭ ހާދިސާއެއް އަނެއްކާ ވެސް ހިނގައިފި އެވެ.

މި ހާދިސާ ހިނގާފައިވަނީ މިދިޔަ ހޮނިހިރު ދުވަހު ދެކުނު ކެލިފޯނިއާގައި ބޭއްވި ރިޕަބްލިކަން ރެލީއެއްގަ އެވެ.

މި ރެލީގައި ވެން މިލާ ނަމަކަށް ކިޔާ ފިރިހެނަކު ލޯޑް ކޮށްފައިވާ ބަޑިއަކާއި ގިނަ އަދަދެއްގެ ވަޒަނާއެކު ވަނީ ހައްޔަރުކޮށްފަ އެވެ. އޭނާ ހައްޔަރުކޮށްފައި ވަނީ މީހަކަށް އަނިޔާއެއް ދީފާނެ ކަމަށް ޝައްކު ކުރެވިގެންނެވެ.

މި މީހާގެއަށް ބަޑި ބޭނުންކުރުމުގެ ފުރުސަތު ލިބުމުގެ ކުރިން އޭނާ ހައްޔަރުކުރުމާއެކު އޭނާ އެ ރެލީ ތެރެއަށް ބަޑި އެތެރެކުރީ ކޮން ސަބަބަކާ ހުރެ ކަމެއް ޔަގީނެއް ނޫނެވެ. އެހެންކަމުން މިއީ ރަސްމީ ސިފައެއްގައި ޓްރަމްޕް އަވަހާރަކޮށްލަން މަސައްކަތް ކުރި ކަމެއް ކަމަށް އަދި ނުބެލެވެ އެވެ.

ޓްރަމްޕް އަވަހާރަކޮށްލަން މީގެ ކުރިން ދެ ފަހަރެއްގެ މަތިން ވަނީ މަސައްކަތްކޮށްފަ އެވެ. މި ގޮތުން ފްލޮރިޑާގެ ގޮލްފް ކޯސްއެއްގައި ހުންނަވަނިކޮށް ޓްރަމްޕްގެ ގަޔަށް ބަޑި ޖަހަން ރަޔަން ވެސްލީ ސައުތު ކިޔާ މީހަކު ކުރި މަސައްކަތް ވަނީ ނާކާމިޔާބުވެފަ އެވެ. މީގެ އިތުރުން ޖުލައި 13 ވަނަ ދުވަހު ޕެންސިލްވޭނިއާގެ ރެލީއެއްގައި ވާހަކަދައްކަވަން ހުންނަވަނިކޮށް ތޯމަސް ކުކް ކިޔާ މީހަކު ވެސް އޭނާ އަވަހާރަކޮށްލަން މަސައްކަތްކޮށްފައިވެ އެވެ. އެ ފަހަރު ޓްރަމްޕްގެ ކަނާތު ކަންފަތަށް ވަނީ ވަޒަން އަރާފަ އެވެ. އަދި ރެލީގައި ބައިވެރިވި އެކަކު މަރުވެ އެހެން މީހަކު ވަނީ ވަރަށް ބޮޑަށް ޒަަހަމްވެފަ އެވެ.