ބޮލީވުޑްގެ މަޝްހޫރު ފަންނާނެއް ކަމަށްވާ ޝާހްރުކް ޚާން ދުންފަތުގެ އިސްތިއުމާލު ކުރުން ހުއްޓާލިކަން އާއްމުކޮށް އިއުލާން ކޮށްފި އެވެ.

މިކަން ޝާހްރުކް ޚާން އިއުލާން ކޮށްފައިވަނީ އޭނާގެ އުފަން ދުވަހުގެ މުނާސަބަތުގައި މިދިޔަ ހޮނިހިރު ދުވަހު ސަޕޯޓަރުންނާއެކު ބޭއްވި ބައްދަލުވުމެއްގަ އެވެ.

ޝާހްރުކް ޚާން ބުނީ އޭނާ ސިނގިރޭޓު ބުއިން އެއްކޮށް ހުއްޓާލާފައިވާ ކަމަށާއި އެކަމުން އޭނާގެ ސިއްހަތަށް ހެޔޮ ބަދަލެއް އަންނާނެ ކަމަށް ހީވި ނަމަވެސް އަދިވެސް ނޭވާ ކުރުވުން ފަދަ ކަންކަން ވާ ކަމަށެވެ.

އެހެން ނަމަވެސް އެ ބަދަލަކީ އެއް ފަހަރުން އޭގެ އަސަރު ފެންނާނެ ބަދަލެއް ނޫންކަން ގަބޫލުކުރާ ކަމަށާއި އެހެން ކަމުން ދިގު މުއްދަތުގައި އެކަމުގެ ފައިދާ ބޮޑުވާނެކަން އޭނާ ފާހަގަކުރި އެވެ.

ޝާހްރުކް ޚާން ވަނީ މީގެ ކުރިން ދުވާލަކު 100 އަށްވުރެ ގިނަ ސިނގިރޭޓު ބޭނުންކުރާ ކަމަށް މީޑިއާގައި އެއްބަސްވެފަ އެވެ. އޭރު އޭނާ ބުނެފައިވަނީ އެ އާދައިން ދުރުވާން މަސައްކަތްކުރާ ކަމަށެވެ.

ހޮނިހިރު ދުވަހު 59 އަހަރު ފުރުނު ޝާހްރުކް ޚާންއަކީ މުޅި ދުނިޔޭގެ އެކި ކަންކޮޅުތަކުގެ މީހުން "އައިކަން"އެއްގެ ގޮތުގައި ބަލައިގަންނަ ތަރި އެކެވެ.

އެހެން ކަމުން ޝާހްރުކް ޚާން ދުންފަތުގެ އިސްތިއުމާލު ކުރުން ހުއްޓާލިކަން އިއުލާން ކުރުމަކީ އެކަމުން ދުރުވާން ގިނަ ބަޔަކަށް ހިތްވަރު ލިބޭނެ ކަމެއް ކަމަށް ގިނަ ބަޔަކު އަންނަނީ ބުނަމުންނެވެ.