ބޮލީވުޑްގެ މަޝްހޫރު ތަރިއެއް ކަމަށްވާ ސަނީ ލިއޯނީއާއި އޭނާގެ ފިރިމީހާ ޑެނިއަލް ވެބާ ދިވެހި ރާއްޖޭގައި ހޭދަކުރަމުން އަންނަ ޗުއްޓީގައި އަލުން ކައިވެނި ކޮށްފި އެވެ.

އިންޑިއާގެ ނޫސްތަކުން ބުނާ ގޮތުގައި ސަނީއާއި ޑެނިއަލް އަލުން ކައިވެނި ކޮށްފައި މިވަނީ އެމީހުންގެ ދަރިންގެ ވެސް ހާޒިރުގައި އޮކްޓޯބަރު މަހުގެ 31 ވަނަ ދުވަހު އެވެ.

އެ ދެމަފިރިންނާ ގާތް ފަރާތްތަކުން މައުލޫމާތު ދޭ ގޮތުގައި އެ ދެމީހުން އަލުން ކައިވެނި ކުރަން ބޭނުންވެގެން އުޅޭތާ ގިނަ ދުވަސްތަކެއް ވެއްޖެ އެވެ.

އެހެން ނަމަވެސް މިހާތަނަށް މަޑުކުރީ އެމީހުންގެ ތިން ދަރިންނަށް ތަންދޮރު އޮޅުންފިލާވަރު ވަންދެން ކަމަށް ވެސް އެ ފަރާތްތަކުން ބުނެ އެވެ.

ސަނީއާއި ޑެނިއަލް ކައިވެނި ކޮށްގެން އުޅޭތާ 13 އަހަރަށްވުރެ ގިނަ ދުވަސް ވެފައިވާއިރު އެ މީހުންގެ ތިން ދަރިން ތިބެ އެވެ. އެއީ ނިޝާ، ނޯއާ އަދި އެޝާ އެވެ.

ދިވާލީގެ ޗުއްޓީއާ ދިމާކޮށް ބޮލީވުޑްގެ ގިނަ ތަރިންތަކެއް ވަނީ ރާއްޖެއަށް އައިސްފަ އެވެ. އޭގެ ތެރޭގައި ސަނީއާއި އޭނާގެ އާއިލާގެ އިތުރުން ކަރީނާ ކަޕޫރު، ސައިފް އަލީ ޚާން އަދި އަކްޝޭ ކުމާރު ވެސް ހިމެނެ އެވެ.