އެމެރިކާގެ ރިޔާސީ އިންތިހާބުގެ ވޯޯޓުލުން އިއްޔެ ނިމިފައިވާއިރު އިންތިހާބުގައި ނަންކިޔާ ދެ ކެނޑިޑޭޓުންގެ ވާދަވެރިކަން ވަނީ އިންތިހާއަށް ބޮޑުވެފަ އެވެ.

އެގޮތުން ޑިމޮކްޓެރިކް ޕާޓީ ތަމްސީލުކުރާ ކަމަލާ ހެރިސްއާއި ރިޕަބްލިކް ޕާޓީގެ ފަރާތުން ވާދަކުރާ ޑޮނަލްޑް ޓްރަމްޕް ރިޔާސީ ރޭހުގެ އެންމެ ކުރީގައި އުޅުނު ނަމަވެސް ނަތީޖާ ނުކުންނާނެ ގޮތެއް އަދި ނޭނގެ އެވެ.

މި ދެ ކެނޑިޑޭޓުންނަށް ސަޕޯޓު ކުރުމުގައި މުޅި ގައުމު ދެބައިވެފައިވާއިރު އޭގެ ތެރޭގައި ހޮލީވުޑް ވެސް ހިމެނެ އެވެ. ހޮލީވުޑްގެ ގިނަ ތަރިންތަކެއް ވަނީ ފާޅުގައި އެ ތަރިއަކު ސަޕޯޓުކުރާ ކެނޑިޑޭޓުން އެންޑޯޒް ކޮށްފަ އެވެ.

އެގޮތުން ފާހަގަ ކުރެވޭ ގޮތުގައި އެންމެ ގިނަ ތަރިންގެ ތާއީދު އޮތީ ހެރިސް އަށެވެ. ހެރިސްއަށް ތާއީދުކުރާ މަޝްހޫރު ތަރިންގެ ތެރޭގައި ޖެނިފާ ލޮޕޭޒް، މެޑޯނާ އަދި ބިޔޯންސޭ ފަދަ ތަރިން ހިމެެނެ އެވެ.

ޖެނިފާ ލޮޕޭޒްއާއި ކޭޓީ ޕެރީ ވަނީ ހޯމަ ދުވަހުގެ ރޭ އޮތް ހެރިސްގެ ކެމްޕެއިން ނިންމުމުގެ ހަފްލާގައި އެމީހުންގެ ހުށައެޅުމެއް ވެސް ހުށައަޅައިދީފަ އެވެ.

ޑޮނަލްޑް ޓްރަމްޕްއަށް ސަޕޯޓުކުރާ ތަރިންގެ ތެރޭގައި އެހާ ނަން މަޝްހޫރު ތަރިން ގިނަ ނޫން ނަމަވެސް ފުދޭވަރަކަށް ގިނަ ތަރިން އޭނާއަށް ވެސް ސަޕޯޓުކުރެ އެވެ.

އެގޮތުން މެލް ޖިބްސަން، ޓޮނީ ހެންޗްކްލިފް، ޖޯން ޝްނައިޑާ އަދި ވިކްޓޯރިއާ ޖެކްސަން ފަދަ ތަރިން ހިމެނެ އެވެ. ހޮލީވުޑްގެ އިތުރުން ކުޅިވަރުގެ ދާއިރާއިންނާއި ވިޔަފާރީގެ ދާއިރާއިން ވެސް ފާހަގަކޮށްލެވޭ ޝަހުސިއްޔަތުތަކެއް ވަނީ ޓްރަމްޕްއަށް ތާއީދުކޮށްފަ އެވެ.

ކޮންމެއަކަސް އިންތިހާބުގައި މުޅި އެމެރިކާ ދެބައިވެފައިވާއިރު ކުރި ހޯދާނީ ކޮން ކޮޅެއް ކަމަށް އެނގޭނީ މިހާރު ގުނަމުން އަންނަ ވޯޓުގެ ނަތީޖާއިންނެވެ.