އެމެރިކާގެ ރިޔާސީ އިންތިޚާބުގައި މިހާތަނަށް ރިޕަބްލިކަން ޕާޓީގެ ޑޮނަލްޑް ޓްރަމްޕް 15 ސްޓޭޓެއް ކާމިޔާބުކުރިއިރު، ޑިމޮކްރެޓިކް ޕާޓީގެ ކަމަލާ ހެރިސް 7 ސްޓޭޓާއި ވޮޝިންގްޓަން ޑީ.ސީ ކާމިޔާބުކޮށްފައިވެ އެވެ. ނަމަވެސް މުހިންމު ބެޓަލްގްރައުންޑް ސްޓޭޓްތަކުގެ ނަތީޖާ ނުނިމި އޮތުމާއެކު އިންތިޚާބުގެ ފައިނަލް ނަތީޖާ އަކާހަމައަށް ދިއުމަށް އަދި ވަގުތުނަގާނެކަމަށް ބެލެވެ އެވެ.

އިންތިޚާބުގެ ނަތީޖާ ނިމިގެންދާނީ 7 ސްވިންގް ސްޓޭޓުގެ ނިންމުމުގެ މައްޗަށް ކަމަށް ބެލެވެ އެވެ. މިހާތަނަށް ޓްރަމްޕަށް 162 އިލެކްޓޯރަލް ވޯޓު ލިބިފައިވާއިރު ހެރިސްއަށް ލިބިފައިވަނީ 81 އިލެކްޓޯރަލް ވޯޓެވެ. ރައީސްކަން ކާމިޔާބުކުރުމަށް ޖުމްލަ 270 އިލެކްޓޯރަލް ވޯޓު ހޯދަން ޖެހެ އެވެ.

މި އިންތިޚާބަކީ ކުރިން ދުވަހަކުވެސް ނުފެންނަފަދަ ކަންތައްތަކެއް ފެނިގެންދިޔަ އިންތިޚާބެކެވެ. މީގެ ތެރޭގައި ޓްރަމްޕަށް އަމާޒުކޮށް ދެފަހަރު ހަމަލާދިނުމާއި ރައީސް ޖޯ ބައިޑަން ކުއްލިއަކަށް ވާދަނުކުރައްވަން ނިންމެވުން ހިމެނެ އެވެ

މި އިންތިޚާބުގައިވެސް ޓްރަމްޕް ވަނީ އިންތިޚާބީ ނިޒާމަށް އިތުބާރު ނުކުރެވޭނެކަމަށް ވިދާޅުވެ، އަސާސެއްނެތް ބިރުވެރިކަން އުފައްދަވަން މަސައްކަތް ކުރައްވާފަ އެވެ. އަދި ބައެއް ސިޓީތަކުގައި މަކަރުހެދިކަމުގެ ތުހުމަތުތައްވެސް ކުރައްވާފައިވެ އެވެ. ނަމަވެސް މި ތުހުމަތުތަށް ވަނީ އިދާރާތަކުން ދޮގުކޮށްފަ އެވެ.

ކޮންމެ ފަރާތަކުން ކާމިޔާބުކުރިނަމަވެސް، މިއީ ތާރީޚުގައި ލިޔެވޭނެ ކަމެކެވެ. 60 އަހަރުގެ ހެރިސް ކާމިޔާބު ކުރައްވައިފިނަމަ، ރައީސްކަން ކާމިޔާބުކުރައްވާ ފުރަތަމަ އަންހެން ރައީސްއަށް ވެގެންދާނެ އެވެ. 78 އަހަރުގެ ޓްރަމްޕަކީ ދެފަހަރު އިމްޕީޗްކުރެވުނު އަދި ޖިނާއީ ކުށެއް ސާބިތުވި ފުރަތަމަ ކުރީގެ ރައީސެވެ.